Shillong, Rymphang 28 : Ka Director General of Police (DGP) jongka jylla ka Kong Idashisha Nongrang ka la maham ïa ki samla ba kim dei ban shah pynbiej ha ki jingkular jongka seng HNLC namar ki jingkular bad ki kam kim ïadei haei haei ruh.
Bun ngut kiba ka seng ka la sdang ban khring ban pynrung dkhot ïa ki hynrei haba la tohkit bad bud dien la shem ba kiba bun ki khlem ngop satia namar ka shu kut tang ha ka jingsdang ban ïakren ne ban ïa phah EPIC tang katta ki khlem pynrung dkhot satia ïa lade.
“ Ngi la ïoh jingtip halor kiba bun ki kyrteng, ngi la bud dien ruh ïa kiba bun ngut ki briew hynrei haba la bishar na ki jingïakren jongki ha ki social media la shem ba ka dei tang ka jingïakren bad ïaphah ïa ka EPIC lait nangta ki khlem leit pynïasoh bad ka seng HNLC” ïathuh ka DHP.
Ka la ïathuh ïa kane hadien ka jingwan pyndem jongu Area Commander ka seng HNLC bad kumjuh ruh hadien ka jingshah kem jong ki arngut na Umsning u Banjop bad u Donbok.
Haba la kylli tharai katno ngut ei ei kiba la poi sha Bangladesh na ka liang ka DGP kam treh ban ïathuh.
Ha kaba ïadei bad ka jingshah kem kitei ki arngut na Umsning ka DGP ka la ïathuh ba ki dei kiba ïadon kti ban buh bom IED ha Umsning. Ka la ïathuh shuh shuh ba ka HNLC ka pynbiej ïa ki samla da ka jingsiew kaba heh bad kumjuh ruh ban pynngop iaki ha kata ka nam ba phi leh na ka bynta ka Ri bad ka Jaidbynriew. Da kane ka sur ki leh naduh sor shaduh nongkyndong hynrei hadien ba ki khun samla ki rung ki lap ba ka ktien bad ka kam kam ïadei satia.
Ha ka jingtohkit ki pulit ki la lap ruh ïa ki video jong ki bom IED na ki phone ba la ïoh kurup da ki pulit.
Halor ka jingkylli hato kine ki ïadon kti ha ka jingpynbthei bom IED ha ki tiar jongka Dhar Kompani, ka DGP ka ïathuh ki lah ban ïadon kti ruh tangba ka jingtohkit bniah ïa ki ka dang ïaid shakhmat.
Ha u snem ba la dep ki don saw ngut kiba wan pyndem bad kine ki wan namar kaei kaba la kular bad kaei kaba la pyntreikam da ka seng HNLC kam don jingïadei wat tang khyndiat ruh, ïathuh ka DGP.
