Lap ka CAG ba siew tam 1.34 klur tyngka sha ki nongtrei bylla ha ka por COVID nalor khlem jingpynshisha

Shillong, Rymphang 28: Kat kum ka kaiphod jong u Comptroller and Auditor General of India (CAG) la kdew ba ka la don ka jingsiew tam kaba palat pud ha kaba ïadei bad ka jingsiew bai lutksan ha ka por COVID-19 ne ka COVID 19 Compensation ïa ki nongtrei bylla tei ïing ne kiwei kiwei ki jingtei ha ka jylla Meghalaya, khlem da don ia ka jingpynshisha kaba thikna ne ki jingtip bniah shaphang ki nongïoh jingmyntoi.
Ka kaiphod kaba la wanrah ha ka ïing Dorbar Thawaiñ ha ka Sngi Thohdieng, kala lap ba 1.34 Klur tyngka la sam palat pud namar ka jingai pisa ne Credit bun bun sien sha ki nongïoh jingmyntoi da ujuh u Registration Number, Bank Account ne Kyrteng.
“Ka Audit kala pyni ba la ïaid lait na ka jingpynbna ka sorkar kaba la lam sha ka jingsiew palat ia ka pisa. Ka jingsiew pisa palat ka dei kaba la lap ha baroh ki district” la pynpaw ka kaiphod jong u CAG.
Ki jingduna ki kynthup ïa ki 4 tylli kiba la siew bunsien ïa ka pisa sha ki nongïoh jingmyntoi da ujuh u Registration Number ne Account Number , 16 tylli kiba la siew bunsien ïa ka pisa lyngba kajuh ka Bank Account bad 262 tylli kiba la siew bunsien ïa ka pisa sha ki nongïoh jingmytnoi da kajuh ka kyrteng.