Shillong, Lber 22: Ka West Khasi Hills kala sdang da ka nam jop ha ka jingïaid lynti jong ka ha ka lympung ïalehkai kriket ki kynthei ba la tip kum ka U-23 Women’s Inter District Cricket Tournament ba pynïaid da ka Meghalaya Cricket Association da kaba pynliem da 26 ron pyrshah ïa ka Shillong Cricket Association
Katei ka nam jop kala wan lyngba ka jinglah ban ïalehkai bha ka Sildamicresha Marbañiang kaba kamai spah ron (century) bad lyngba ki san wicket bala khur da ka Abiezer Kharsyiem ha ka jingïalehkai ha ka sngi Ba-ar ha Nongstoiñ.
Ka Sildamicresha Marbañiang ka khyrwit haduh 106 ron na ki 108 bol hadien ba ka WKH kala kam ban tied nyngkong da kaba jop ïa ka jingkynting pisa. Kane ka thei ïalehkai kaba dei ruh ka kapten kala sdang ban tied nyngkong bad kala lah ban kamai ron bun, da kaba khyrwit haduh 12 tylli ki boundary. Ka la lah ban ïalam ïa ka kynhun sha ka jingkamai 207 ron bad ka kynhun kala shah pynkhyllem noh 9 wicket ha baroh ki 35 over. Ka Marbañiang kala kamai ron lang da 50 ron bad ka Evanrilin Syiem bad 54 ron ryngkat ka Ridahun Nongsiej.
Ka Neha Hajong ka khur 3 wicket ai kamai 35 ron bad ka Natasha Rabha ka khur 2 wicket ai kamai 55 ron na bynta ka SCA.
Haba beh ïa katei ka thong, ka Shillong ruh kala pynpaw ïa ka jingkhlaiñ ha ka kamai ron, ha kaba ka Hajong ka kamai 29 ron, ka Mansi Anand 28 na ki 27 bol bad ka Suriti Kumari Rai ka kamai 65 ron na ki 62 bol. Ka Hajong bad ka Anand kila buh da 50 ron na bynta ka jingduh noh shi wicket hashwa ba kitei ki arngut kila shah pynhap wicket noh ha ka kti jong ka Kharsyiem.
Ka Shillong kala lah ban kamai ron bha haba nujor bad ka run rate hynrei, nalor kitei ki lai ngut ki thei tied kiba kamai bun ron, kiwei pat ki khlem lah ban ïakami ron ha kaba ka kynhun kala shah pynkhyllem lut baroh ki wicket bad kynjoh tang sha ka 181 ron ha ki 27.5 over.
Ka Kharsyiem kala pyndep da kaba khur 5 wicket ai kamai 30 ron na bynta ka WKH. Kumta ka WKH kala sdang da ka nam jop ha ka Group B jong ka Zone 1 bad khur ïa ki ar point.
Ki don 10 tylli ki team kiba ïashim bynta ha kane ka tournament. Ha ka Zone 1 ki don hynriew tylli ki team ïa kaba la phiah ha ar tylli ki group, ba kynthup ïa ka East Khasi Hills, All Jaintia CA bad ka Ri-Bhoi kiba don ha ha ka Group A bad ka WKH, SCA bad ka South West Khasi Hills ha ka Group B.
Ha ka Zone 2 ka don tang kawei ka group ba kynthup ïa ka Tura District CA, North Garo Hills, East Garo Hills bad ka South Garo Hills. Ïa baroh ki jingïakhun jong ka Zone 2 yn pynlong ha Nongalbibra, South Garo Hills, bad ka jingïakhun kan sdang naduh ka 24 tarik Lber.
Ka jingïakhun ha ka sngi Balang na ka Group A jong ka Zone 1, ka Ri-Bhoi kan aireng pyrshah ïa ka All Jaintia CA.
