Kynduh ka kynhun ki IAS ba dang shah pyntbit ïa u Lat ka Jylla, ïa kren halor ka shakri paidbah

Shillong, Rymphang 28: Ka kynhun jong ki 11 ngut ki ophisar IAS kiba dang shah pyntbit ki la leit ban ïakynduh ia u Lat ka jylla u C.H. Vijayashankar ha Lok Bhavan, kiba ïakren halor ka jingsynshar, ka jingshakri paidbah, bad ki mat ba kongsan jong ka roi ka par jong ka jylla.
Kane ka jingleit ban kynduh kine ki IAS bas dang shah pyntbit kadei ha ka sngi Thohdieng bad ha ka jingia phylliew jingmut ki la ïohi ïa u Lat ba u pynksan ïa ka bynta jong ki nongtrei sorkar ban pynthikna ïa ka jingsynshar kaba shai bad kaba pynshong nongrim ha ki nongshong shnong.
” Ka bynta ba kongsan jong ki nongtrei sorkar ka long ban pynthikna ïa ka jingsynshar kaba shai, kaba don jingkitkhlieh, bad kaba pynshong nongrim ha ki nongshong shnong,” u la ong, da kaba kyntu ïa ki ophisar ban trei da ka jingaiti lut bad ka jinglong ba janai.
U Vijayashankar u la pynpaw ïa ka jinglong kyrpang jong ka imlang sahlang jong ka Meghalaya, da kaba pynksan ïa ki jingpyrshang ba ïatreilang na ka bynta ka roi ka par.
“Ki jingangnud jong ka Meghalaya ban roi ki donkam ïa ka jingïatreilang hapdeng ka bor synshar bad ki nongshim bynta bapher bapher ban ïoh ïa ka jingroi kaba kynthup lang bad ka jingkiew kaba neh,” u la kdew.
Kine ki IAS ba dang hikai ki la pynpaw ka jingsngewnguh ïa ka jingïalam jong u Lat, ha kaba ïa ka jingïalang la pynkut da ka jingkular kaba thymmai ban pynkhlain ïa ka jingsynshar bad ban pynïaid shakhmat ïa ka jingthmu ban pynroi ïa ka jylla.