Ym biang ka rukom pyntreikam ïa ka Labour Welfare Scheme ha Meghalaya pynpaw ka kaiphod CAG

Shillong Rymphang 28: Ka kaiphod Comptroller and Auditor General of India (CAG) ka la pynpaw ka jingsngewkhia jur halor ka jingbym biang ka rukom pyntreikam ïa ka Labour Welfare Schemes ha Meghalaya, da kaba pynpaw ba ka la don ka jingsiew palat pud bad ka jingpynduh jingmyntoi ïa kiba dei hok ki ban ïoh jingmyntoi.
Ka kaiphod jong ka Social and Economic Sectors and Urban Local Bodies kaba kut ha ka 31 tarik u Lber 2023, kaba la wanrah da u Myntri Rangbah ka jylla u Conrad K Sangma ha ka ïing Dorbar Thawaiñ ha ka sngi Thohdieng, ka la pyni ba ka la don ka jingthep pisa kaba bunsien sha ki nongïoh jingmyntoi ha kajuh ka kyrteng, kaba kynthup ïa ki 4 tylli ki Account bala thep haduh 20,000 tyngka shisien thep , sa 16 tylli ki Account ruh la thep bun bun sien kaba la thep haduh 80 hajar tyngka shisien thep bad kumjuh ruh 262 tylli ruh ki Account kiba la thep pisa bun sien.
Nalor kane, ka CAG kala lap ba 156 ngut ki nongïoh jingmyntoi ki la duh ïa ka 4.68 lak tyngka ha ka ban ïoh jingmyntoi na ka jingpunkhun ka jong ki, watla ki la ïoh ïa ka jingmynjur ban ïoh ïa katei ka scheme.
“Ka jingai jingïarap ïa ki longkmie kiba punkhun ka long sha ki 147 ngut kaba ka jinglut jingsep kala kot 4.41 lak tyngka la phah ïa ka pisa lyngba ki Bank Account ki jongki” la pynpaw ha ka kaiphod.
Ka Tnad Labour kam shim la ai ïa kano kano ka daw halor ka jingbym phah ïa ka pisa sha kiba dei hok ban ïoh ïa ka jingmyntoi.
Ka CAG kala pynpaw ruh ba 64 ngut kiba dei ban ïoh jingmyntoi ki la duh ïa ka 1.28 Klur tyngka ha ka jingïoh jingmyntoi halor ka jingiap, watla ka Board kala pyllait ïa katei ka pisa.
“Ka Board kala pynpaw ba 64 ngut ki nongïoh jingmyntoi kim shym la don ïa ki kot ki sla kiba biang bad ka jingkam ka dei kaba hap ban khmih biang hadien ba la ïoh pdiang ïa ki kot ki sla kiba donkam” la pynpaw ka kaiphod.
Ka CAG ka la lap ruh ba ka jingai khusnam da ka pisa ïa ki khynnah kiba wan shakhmat ha ki jingpule kam dei kaba lah pyntreikam thikna bha, ha kaba ym shim la don satia na ki 12 ngut kiba lah aplai ban ïoh pdiang ïa ki jingiarap namar ka jingbym shai ki kyndon treikam.
“Ka Welfare Board kam shym la pynsaphriang ïa ki kyndon treikam kiba biang ha kaba ïadei bad ka jinglah jong kito kiba aplai. Kam shym la don kino kino ki kam ki jam jongka IEC kiba la pynlong ïa ki nongbylla kiba la register ban ïoh ïa ki jingtip shaphang katei ka scheme” la pynpaw ha ka kaiphod.
Ka Tnad Labour kam shym la ai jingpynshai ïa ki jingpan jingpynshai jong ka CAG, kaba la pynmih ïa ka jingsngewkhia halor ka jingpyntreikam ïa ka Labour Welfare Schemes ha ka jylla.