Shillong, Rymphang 28 : Ka Director General of Police (DGP) jongka jylla ka kong Idashisha Nongrang ka la ïathuh ba hynnin ka Sngi Thohdieng ki pulit ki la ïoh ban kurup haduh 62 matric ton u dewiong ba la tih beaiñ ha East Jaintia Hills District.
Ka DGP ka la ïathuh kumba long mynta ki don haduh 5 tylli ki kynhun pulit ba kynthup bad ki magistrate kiba pynlong ïa ka jingkhynra ba man la ka sngi ha East Jaintia Hills.
Haba kylli halor ka jingjia ba dang shen ka jingbthei bom ha ka jaka tih dewiong ha Mynsngat-Thangsko kaba ha East Jaintia Hills ka DGP kam treh ban kynthoh ne kren namar ka ong ba ka jingtohkit ka dang ïaid shakhmat bad sa kawei ruh kane ka kam mynta ka don ha ka ïing bishar.
“ Ngam kwah ban ong ei ei namar ka long pyrshah ïa ka bor jongka ïing Bishar tangba tang kawei ka long ba ka jingshong bishar biang ïa ka kam kan long ha ka 5 tarik. Na ka liang ki pulit ka East Jaintia Hills bad ki kynhun ba la thung ban bud dien ïa ka kam ki la leh ïa kaei kaba donkam” ong ka DGP.
Halor ka jingduna pulit na ka liang ka DGP ka la ïathuh ba ka jingthung kam pulit ïa ki 2800 ngut kan ïarap ïa ka tnad namar kine ki hap ban shimti noh ïa ka kam ha ka taiew ban wan bad ki hap ban leit pyndep ïa ka jingpyntbit kumba 9-10 bnai ei ei shwa ban buh ïa ki sha kino kino ki jaka.
