Ar taïew ai por JTTA ïa ka JHADC ban jubab ïa ka jingduna ki stall ha Iawmusiang Shopping Complex

Jowai, Rymphang 28: Ka seng ki nongshong die jingdie ha Iawmusiang Jowai kaba la tip kum ka Jaiñtia Tribal Trader Association (JTTA), mynta ka sngi siitjaiñ 28 tarik kala pynlong ïa ka jingïalang (General Meeting) ha Tpep-pale Community Hall, Jowai.
Ha kane ka jingïalang la ïakren ha kaba ïadei bad ka Iawmusiang Shopping Complex kaba la jan ban dep mynta, na ka bynta ban pyrkhat ïa ki nongshong die kiba dei hok ban ïoh ïa ki dukan ne stall ha katei ka complex ne ïa kiba don ka permit.
Na ka liang u President ka seng u ma Iatha Najiar, ula ïathuh ba katei ka Shopping Complex ka don 300 tam tylli ki stall ne ki dukan, hynrei ki nongshong ïew jong ka Iawmusiang ki don haduh kumba 600 tam ngut kiba don ïa ka Permit, ha kaba kane ka lah ban wanrah ïa ka jingeh kaba khraw.
Ula ong ruh ba ha ka jingïadei bad kane na ka liang ka seng la bun sien ka la dep ban thoh shithi sha ka ophi jong ka Jaiñtia Hills Autonomous District Council (JHADC), hynrei haduh ym shym la ïoh ïa ka jubab tang shisien ruh halor katei ka jingeh.
Kumta ha kane ka jingïalang mynta ka sngi na ka liang ki nongïalam jong ka JTTA ryngkat bad ki nongshong die ki la rai ban ai por haduh ar taïew ïa ka JHADC kaba dei peit ïa ka ïew ka hat, ban ai ïa ka jubab halor ka jingduna jong ki jaka shong die hapoh katei ka Complex.
Lada na ka liang ka JHADC kam ai ïa ka jubab na ka liang ka JTTA kumjuh ruh ki nongshong die kin mih paidbah ban leit sha ka ophis jong ka JHADC na ka bynta ban ïoh ïa ka jubab kaba shai.
Shuh shuh la ïathuh ruh ba hapoh kine ki snem kiba la dep, don napdeng ki nongshong die jingdie ha Iawmusiang kiba siew manla u snem ïa ka bai Permit bad don kiba khlem siew thikna.