Shillong, Rymphang 28: Ka Sorkar jylla ha ka sngi Saitjain ka la plie ïa ka National Human Papillomavirus (HPV) Vaccination kaba dei ruh kum ka lad jingïalap ha kaba ïa kane ka prokram la pynlong ha Ganesh Das Hospital, Lawmali, Shillong, bad kane ka long ruh kum ka jingïatreilang bad ka jingplie u Myntri Rangbahduh ka ri ha Rajasthan.
Ïa kane ka prokram la ïalam da u Ramakrishna Chitturi, IAS, Additional Secretary, Health & Family Welfare and Mission Director, National Health Mission, ka sorkar jylla, ha ka jingïadonlang ki heh ophisar, ki nongtrei jong ka tnat ka Koit ka Khiah, kiba ïatreilang bad kiwei kiwei kiba shah khot sngewbha. Ïa kane ka prokram la plie da iwei i khynnah ba dang 14 snem ka rta iba dei ruh iwei na kiba ïoh jingmyntoi ïa ka HPV Vaccine ha ka jylla mynta ka sngi.
Ïa kane ka prokram la sdang da ki kyntien lamphang da State Immunization Officer, Dr. P. R. Marak ba la batai shaphang ki jingbthah ha kaba ïadei bad kane ka jingai vaccine. La don ruh ka jingai jinghikai jingbatai ha kaba ïadei bad kane ka HPV Vaccine bad ka Cervical Cancer na Dr. Shailinia Syiem, Gynaecologist, President State, O&G Society, FOGSI bad ba la batai ruh halor ki rta jong ki khynnah kiba dei ban ïoh ïa kane ka jingai vaccine ba kin dei kiba ha ka rta kaba 14 snem.
Ka la ong ruh ba ki longkmie kiba ha ka rta kaba 20 bad 30 snem haduh 45 snem ka rta ki lah ban shim ïa kane ka vaccine bad kin lah ban ïoh ka jingïada kaba long 88%. La ong ruh ba kane ka HPV kam ktah tang ïa ki khynnah kynthei hynrei ïa ki shynrang ruh.
Ha kane ka prokram la ïoh ruh ka jingkren na Dr. Angel Kharduit, DMHO East Khasi Hills bad Dr. Rapbor Laloo, District DIO, East Khasi Hills District bad kiwei kiwei.
