Pyndonkam u bah Ardent tang ïa ka kyntien Khasi pyrshah jur u Dy.CM kyntu kynthup ïa ka ktien Jaintia
Ha ka jingïatai nia halor ka Reservation Policy
Shillong, Rymphang 27 : U Symbud Myntri Rangbah ka Jylla u Ma Sniawbhalang Dhar ha ka sngi Palei, ula ïeng ban pynpaw ka jingpyrshah ïa ka jingkren u nongïalam ka VPP Ardent M Basaiawmoit uba pynmih tang ia ka kyntien “Khasi” ha ka jaka “Khasi-Jaintia” ha ka jingïatai halor ka kaiphod ka Expert Committee halor ka Reservation Policy myn ha ka 25 tarik Rymphang.
U Lamphang ula ai ka rai ba ka jingbuh jingthoh ïa kaei kaba la ïatai ha ka ïing Dorbar, ka dei ban pynneh ïa ka kyntien “Khasi bad Jaintia”.
“Nga wanrah ïa ka mat pyrshah halor ka jingkren jong u dkhot na Nongkrem u dkhot ula kdew ia ka kyntien “Khasi” bad ym shym kynthup lang ïa ka Jaintia. Kumba baroh ngi tip ba ka Reservation Policy, ka la buh ïa ka bhah ba kyrpang ïa ki Khasi bad Jaintia” ong u Ma Sniawbha haba kyntu ïa u Lamphang ban buh ha ka jingthoh ba dei ban pyndonkam beit ïa ka kyntien Khasi Jaintia.
U Bah Ardent ula pynksan ïa ka jingjied jong u ban pyndonkam ïa kane ka kyntien bad ong “Nga khmih lynti ba u Symbud Myntri Rangbah un long rangbah bha ha ka ban sngewthuh haba nga ong Khasi..Nga tip kiei ki Khasi, Nga ju pyndonkam beit ïa ka ktien “Khasi” namar nga kwah ban pynïatylli ïa ka Jaidbynriew .Ngi long kawei kum ka imlang sahlang bad ngi dei kawei kum ka Jaidbynriew” ula ong haba bynrap ba um don satia ia kano kano ka jingmut kaba sniew bad khlem khmih lynti ba u Symbud Myntri un kren ïa ka mat hapoh ka ïing Dorbar.
Haba bynrap ia ka jingkren u Ma Sniawbha, u Myntri ka Koit ka Khiah u Ma Wailadmiki Shylla ula pynpaw ba ka Notification 1972 ka la pynpaw shai ïa ka kyntien “Khasi bad Jaintia”.
“Ngi wan hangne ym ban ïakdew kti kaei kaba la akren kan ha ki jingbuh jingthoh ngi kwah tang ban pynbeit ïa kaei kaba ïakren, ngim kwah ban pynïapait ïapra” ula ong.
U Bah Ardent ula ïai ban ba ula pyndonkam khang ïa ka kyntien “Khasi” ban khanglad ïa ki bor ba nabar ba kin pharia ïa ka Jaidbynriew.
Haba ai ïa ka rai, u Lamphang u Thomas A Sangma ula ong “Kat kum ki jingthoh, la ju kdew beit ïa ka kyntien Khasi bad Jaintia ha ka Reservation Policy, kumta ngan pynbeit ïa kane ka jingkren kumba dei ban buh beit ïa ka kyntien Khasi bad Jaintia”.