Pynrem bad kynthoh tyngeh u Myntri Rangbah halor ka jingkren pyrshah u Sunil Deodhar

Shillong, Rymphang 26 : U Myntri Rangbah ka Jylla, u Conrad K Sangma u la ther tyngeh ïa u nongïalam barim ka BJP, u Sunil Deodhar halor ka jingkynthoh pyrshah jong u ïa ki Khristan bad ïa ka Jylla bad pynsaphriang ïa video ba u kren ha ka jingïalang jong ka Indigenous Faith Conference kaba long ha Pynter, East Khasi Hills dang shen.
U Myntri Rangbah haba kren bad ki lad pathai khubor ha kane ka sngi Palei u la ong ba kane ka jingkren ka dei ka jingkren kaba ïalam bakla bad ka bym dei, bad ka bym lah ban pdiang namar ka dei ka jingkren pynshit ban thmu ban pharia ïa ki paidbah.
“Na ka liang ka sorkar ka la shim ïa ki sienjam bad ba u Sunil u dei ban weng noh ïa kane ka jingkren bad panmab na ki paidbah halor ka jingkren jong u ïa ka imlang sahlang,” u la ong da kaba bynrap ba ka sorkar kan sa shim ïa ki sienjam khnang ba kum kine ki jingkren kim dei ban dang mih shuh hadien habud.
U Myntri Rangbah u la ïathuh ruh ba ïa kane ka kam ki la dep ruh ban ïa kren ha ka sorkar hynin ka sngi kumjuh ha kane ka sngi.
Da kaba pynpaw ba kum kine ki jait jingkren ki pyndom ïa ki khristan hynrei u la kyntu pat ïa ki ba kum ki paid khristan kim donkam ban pynphai kylliang hynrei ban don ka jingngeit ha ka jingmab. Tangba u ïai ban pat ba utei u rangbah u dei ban panmab halor katei ka jingkren jong u.
Ha kawei ka liang u Myntri Rangbah u la ong ba ka Sorkar naduh kaba sdang ka ai ka jingkyrshan ïa baroh ki jingngeit, ki jaitbynriew bad ïa ka imlang sahlang baroh kawei, bad ha kaba ïadei bad ki Niam Tynrai kane ka Sorkar ka la ai bun ki skim bad jingïarap bad ki nongïalam jong ki ki tip bha ïa kata.
U la kdew ba kane ka sorkar kala ai bun bha ki skim na ka bynta jong ki bad katto katne na kine ki skim ki kynthup ïa ka Cultural Centre ha Mawkhar, nangta ha ka thain Smit kaba ma u hi dalade u leit ban plie, bad kumjuh ka skim CMSDS kaba u ai ha Bañiun nalor bun kiwei kiwei pat ki skim.