ïaid shakhmat ka NTPC Khelo India NE Zone Open Archery Tournament

Shillong, Rymphang 26: Ka Archery Association of Meghalaya (AAM), hapoh ka jingpeit jong ka Archery Association of India (AAI) ka la ïoh ban sdang ïa ka NTPC Khelo India North East Zone Open Archery Tournament hynne ka sngi Palei (26 tarik Rymphang) ha madan siat khnam jong ka Sports Authority of India Training Centre, NEHU – Shillong.
Katba ïa ka jingïakop ha ka Recurve Division la pynlong hynne ka sngi Palei, ha ka sngi ba bud, kaba long mynta ka sngi Thohdieng (27 tarik Rymphang) yn ïoh ban pynlong sa ïa ka jingïakhun ha ka Compound Archery.
Ki la don palat 120 ngut ki nongsiat khnam na Arunachal Pradesh, Assam, Manipur, Meghalaya, Nagaland bad Sikkim kiba la pynrung kyrteng na ka bynta kane ka lympung.
Ka wat ïaknieh rung (qualifying round) ha ka Recurve Division la pynlong ha ka por mynstep, bud sa ka elimination round bad pynkut pat da ka jingïakhun ïaknieh khur takma ha ka por nohphai sngi, ha kaba u Devraj Mohapatra u la jop takma ksiar ha ka kyrdan ïakop jong ki shynrang lane ka Men’s Recurve.
Ha kane ka sngi la wan ban sakhi lang da u Myntri ba dei khmih ïa ka tnat Sports & Youth Affairs u bah Wailadmiki Shylla kum u Kongsan, ha kaba u la ïashim bynta ruh ban sam ïa ki khusnam sha ki nongjop.
Kiwei pat ki riew pawkhmat kiba la don lang ki kynthup ïa u Dr KB Gurung uba dei u General Secretary ka Sikkim Archery Association bad u Vice-President jong ka AAI; ka Chekrovolu Swuro kaba dei ka nongïalehkai Olympic bad nongïoh khusnam Arjuna kaba long ruh ka President jong ka Nagaland Archery Association bad Vice-President jong ka AAI; u Rupesh Kar, General Secretary jong ka West Bengal Archery Association; bad ka M War Nongbri, AAM Chief Adviser.
Haba phai sha ki resol jong ka jingïakhun ha ka Recurve ki kynthei, ka Yumnam Anuparna Devi na Manipur ka la ïoh ban khur ïa ka takma ksiar da 6 point hadien ba tam da 2 point ïa ka Vesevolu Swuro jong ka Nagaland kaba la jop takma rupa. Ha ka jingïaknieh kyrdan ba lai, ka Kevikieno Rikha jong ka Nagaland ka la lah ban pynliem noh ïa ka Yaikhombi Thongam na Manipur ban pynthikna ïa ka takma rnong.
Ha ka phainal jong ki shynrang, u Devraj ka Meghalaya u la khur takma ksiar da kaba jop 6-0 pyrshah ïa u Keithellakpam Rohit Meitei ka Manipur. Ka jingïakhun ban ïoh ïa ka takma rnong ka la long hapdeng ki nongsiat khnam ka Meghalaya, kata u Vivek Sunar bad u Hypormi Wanniang, ha kaba u Vivek u la jop da 6-2.
Kane ka dei ka sien kaba lai lynter ba ka AAI ka pynlong ïa kane ka lympung. La pynlong ïa ka ha kylleng ki san tylli ki zone, kane ka lympung ka dang bteng ban shakri kum ka rynsan ban pynroi, pynpaw pyrthei bad ban pynkhlaiñ ïa ka jingïashim bynta na ki synjuk siat khnam jong ki jylla, ki board ïalehkai bad ki dkhot ba ïatreilang.
Ka jingkyrshan ba la ai da ka NTPC bad ka SAI ka long kaba kordor bad ka pyni ia ka jingangnud jong ki ban kyntiew ïa ka jingïakopsiat khnam ha ka ri, kaba ym tang ba kan kyntiew ïa ka jinglong bad jingheh jong ki lympung siat khnam hynrei kan ai ruh ïa ka rynsan kaba kham khraw ïa ki nongsiat khnam jong ka ri India ban pynbha ïa ka jinglehkai bad ban kham pyntbit shuh shuh ïa lade.