SAITSOHPEN, Rymphang 26: Ka sngi ba hynñiew (Day-7) jong ka lympung 5th District League T20 Cricket Tournament 2026 ba la pynïaid da ka East Khasi Hills Cricket Association (EKHDCA) la sakhi ïa ka Cricket Lovers bad ka Hurdles Cricket Club Mawsynram kiba la jop ïa la ki jong ki jingïalehkai.
Na ka liang jong ka Cricket Lovers ka la pynliem noh da 9 wiket ïa ka Sportopia SCC ha ka jingïalehkai ba nyngkong, nangta ka Hurdles CC ka la jop da 2 wiket ïa ka Friends United.
Ka jingïakhun ba nyngkong la ïohi ïa ka Sportopia kaba la kam trai ban tied nyngkong hadien ba jop ïa ka jingkynting pisa (toss), bad kamai 118/9 haki 20 ober, nangta ka Cricket Lovers ka pyndep ïa ka kamram ban kamai 121/1 ron tang hapoh 11 ober.
Ha ka pali tied jong ka Sportopia u Banshankur Sohtun u la ïohlad ban tied 33 ron naki 39 tylli ki bol, katba u Damechwa Khongsngi u la khur 3/13 naki 4 ober.
Haba jubab, u Mewankitbok Kharpuri u la lah ban kamai 75 ron naki 43 tylli ki bol ban ïalam ïa ka Cricket Lovers ban poi sha ka thong, kaba pynlong ruh ïa u ban khur ïa ka khusnam Player of the Match.
Nangta ha ka jingïalehkai kaba bud, ka Hurdles CC Mawsynram ka la khanglad ïa ka Friends United tang na ka bynta 97/10 haki 16.2 ober shuwa ba kan tied 100/8 haki 17.1 ober ban khur ïa ka jingjop.
Dei tang u Nangkiewkor Moore Don (24 ron naki 23 bol) uba la kham seisoh ha ka pali tied jong ka Friends United, katba u Rickystone Nongbet u la khur 3/29 naki 3 ober.
Wat hapdeng ka jingïalehkai bha jong u Bryan Marbaniang, uba la khur 4/5 naki 4 ober, hynrei ka jingnoh synñiang kaba 32 ron (40 bol) na u Nangsan S Kynter bad katto katne na kiwei pat ka la biang pura ïa ka Hurdles CC Mawsynram ba kan poi sha ka thong.
Ha kaba kut, u Nangsan S Kynter jong ka Hurdles CC u la shah jied ban khur ïa ka khusnam Player of the Match.
