SHILLONG, Rymphang 26: Ka Sputnik Spartan ka la khur jingjop da kaba pynliem noh da 23 ron ïa ka Lok Bhawan hynne ka sngi Palei ha ka lympung Shillong Cricket League Super Division 2026 jong ka Shillong Cricket Association, ha madan kriket ha Polo.
Hadien ba shah pynkhamti ban tied nyngkong ka Sputnik Spartan ka la kamai 152 ron shuwa ban khyllem baroh 10 wiket haki 24.2 ober, ha kaba u Jitumoni Kalita (34 ron naki 25 bol) bad u Uttam Chanda (29 ron naki 29 bol) kidei ki nongtied kiba kongsan tam.
Napdeng ki nongkawang bol jong ka Lok Bhawan, u Andrew Ropmay (3/16 naki ober) bad u Bikash Singha (3/29 naki 5 ober) ki la ïoh ban khur mar lai wiket.
Wat hapdeng ka jingnoh synñiang kaba thikna na u Wanz Mawroh (30 ron naki 20 bol) bad u Asif Khan (24 ron naki 28 bol) ka Lok Bhawan ka la mad ïa ka jingshah rem namar ba ka la pyndep ïa ki 25 ober tang na ka bynta 129 ron bad khyllem 9 wiket.
Ki nongkawang bol ba seisoh tam jong ka Sputnik Spartan ki long u Jitumoni Kalita (2/12 naki 5 ober) bad u Kishley (2/15 naki 4 ober).
Na ka bynta ka jingïalehkai kaba kyrpang ha baroh ki liang, u Jitumoni Kalita (kamai 34 ron ha ka tied; weng 2 wiket ha ka boling) u la ïoh ban khur ïa ka khusnam Player of the Match.
