Ai jingmut u Bah Ardent ban kyntiew 47 % ïa ki Khasi Jaintia, ha ka Meghalaya Reservation Policy

Shillong , Rymphang 25: U MLA ka liang pyrshah uba dei ruh u President ka Voice of the People Party (VPP) u Bah Ardent Miller Basaiawmoit, ha ka sngi Balang u la ai jingmut ïa ka jingdonkam ban kyntiew ïa ka bhah thung kam thung jam da 47% na ka bynta ki Khasi Jaintia.
U Bah Ardent u la ong ba ka party VPP “kam sngewhun bad kmen” ïa ka jingai jingmut jong ka expert committee ban pynneh beit kumjuh ïa ka Meghalaya reservation policy kumba ka long, bad ka thmu ban pynbor ïa ki jingkylla ynda ka la ïakynduh ïa ka sorkar.
“Ngim sngewhun satia bad ngin ym pdiang ïa ka jingai jingmut ha ka dur tynrai jong ka”, la ong u bah Basaiawmoit ha ki nongthoh khubor hadien ba la wanrah ïa kane ka mat hapoh ka iing dorbar Assembly. “Kaei kaba ngi dang ïakren ka dei ki jingai jingmut…ka dang sah ban pdiang da kaba pynbna.Ka jingkylli kaba kongsan bha ïa u myntri rangbah ka long hato un shim khia ïa ngi shwa ban pdiang ïa ka.”
U Myntri Rangbah ka jylla u Conrad K. Sangma kham mynshwa u la ïathuh ha ka ïing dorbar ba u plie lad ban ïakynduh ïa ki nongthaw aiñ, ka jingpynpaw kaba u Basaiawmoit u la mynjur.
“Nga thikna ba phi la dei ban iohsngew ba u myntri rangbah u kloi ban ïakren bad ngi marwei marwei… ngin ïaid lyngba kata shwa bad ngin sa wad ruh shuh shuh ïa ki lad ki lynti kumno ban pynthikna ba ïa kaei kaba ngi kwah kum ka seng… yn sa leh ha ka rukom kaba dei.”
U Bah Basaiawmoit u la kynthoh ïa ka jingïapher kaba 8 bnai hapdeng ka jingai jingmut jong ka committee bad ka jubab jong ka sorkar, da kaba ong ba ka jingpynslem ka la pynlong ïa ka VPP ban “artatien,” watla u la bynrap ba ka seng kam kwah ban “kynthoh palat.”
U la buh ïa ka jingdawa ha kylleng ka jinglong jong ka Meghalaya bad ka jinglong tynrai jong ka thain bad u la ong, “U myntri rangbah u la kam ba ka Meghalaya ka dei ka jylla riewlum…jan baroh ki riewlum ha NE ki don palat 80% ka jingbhah kyrpang…wat ka Supreme Court ka la ong ba ïa ki riewlum kim lah ban buh ha kajuh ka nongrim kum kiwei pat lada ka sorkar ka dang shim ïa ka sienjam.”
Da kaba pynpaw ba ka VPP kan nym kyrkieh ban buh por, u la ong, “Kumba ka long mynta ngim ïohi ïa ka jingdonkam…ngin leit ban ïakynduh ïa ka sorkar jylla bad ban ïakren, bad ngi kyrmen ba ka sorkar kan jubab ha ka rukom kaba bha.”
Ha kajuh ka por, ka seng ka thmu ban “wad da kiwei pat ki lad ki lynti” bad ban pan jingmut na ki paidbah.
“Ki paidbah ka jylla ki la long ki nongshim bynta ba kongsan ha kane ka jingïakhih… ngin hap ban leit sha ki paidbah, ban pynshai, bad ban pan jingmut na ki bad ka lah ban ïaid lang,” u la ong.
Halor ki jingkheiñ, u Basaiawmoit u la ïada ïa ka jingkhot jong ka VPP ban buh kyrpang 47% ïa ki Khasi-Jaiñtia da kaba ong, “Ngi sngew ba lada ka sorkar ka sngewthuh ïa ka jingpynbor… ïa ki samla kiba la nang la stad bad kiba la tbit, kata ka dei ka jingkheiñ kaba biang bha.”