Shillong, Rymphang 25: Ka National People’s Party (NPP) kala pynpaw ïa ka jingsngewkhia kaba jur halor ka jingkren kaba long kum ka jingpynpait pynpra kaba dang shen kaba la kren ne kynthoh da u Sunil Deodhar uba dei u nongïalam ka RSS ha ka jingïalang jong ka Indigenous Conference kaba la long ha ka shnong Pynter, East Khasi Hills Meghalaya.
U Bah Himalaya M Shangpliang uba dei u nongai ktien ka NPP u la ong,”Ngi pynrem jur ïa kane ka jingkynnoh khlem nongrim kaba la long pyrshah ïa ka Sorkar”.
U Bah Shangpliang u la ong, “Ki jingkynnoh ki long kiba bakla bad kiba khlem ka jingshisha bad kaba thmu ruh ban pynmih ïa ka jingshun bad jingïapher ha ka imlang sahlang.Ngi kyntu ïa baroh ban kyntait ïa kum kine ki jingkren pynpait pynpra hynrei ban kyntiew ïa ka jingïatylli mlon kum kawei”.
Shuh shuh u la ong, Kum ka party kaba kut jingmut ban aiti bad ban kyntiew ïa ka jingiatylli ha ka imlang sahlang bad ngin ïai trei na ka bynta ka jingiatylli bad ban pynthikna ba baroh kin lah ban im lang kum kawei khlem kano kano ka jingtieng ne jingshah pynsheptieng.
Kum ki nongialam kiba don ka jingkit khlieh ban wanrah ïa ka jingsuk, ka jingïaishah, ka jingïasngewthuh jingmut bad ka jingïatylli, u la ong.
” Ngi dawa ka jingmab bad ka jingkit khlieh na ka bynta ka jingkren kaba pynjah burom bad kaba khlem nongrim ba la kren da utei u nongialam jong ka RSS” ong u Bah Shangpliang.
