Shillong, Rymphang 25 : U nongïalam ba rangbah ka BJP ba dei ruh u National Secretary brim ka BJP u Sunil Deodhar u la ai jingpynshai da ka jingthoh ban pynpaw ïa ka jingsngewsih halor ka jingkren jong u ha ka Indigenous Faith Conference kaba long ha Pynter, Pynursla (East Khasi Hills), hadien ba ka party ka la pan jingpynshai na u.
Ha ka shithi ba u phah sha u Bah Wankitbok Pohshna State General Secretary jong ka BJP, u Deodhar u la pynpaw ruh ba u niew burom ïa u Trai Jisu Christ bad don ka jingieid ba jylliew ïa ki paid Khristan.
Nalorkata, u la thoh ruh da kaba ong, “Kam dei satia ka jingthmu jongnga ban pynmong ïa ki para khristan jongnga. Lada kino kino ki kyntien kiba nga kren ki long kiba pynmong lane wanrah ka jingsngewsih, nga pynpaw ïa ka jingsngewsih halor kata.”
U Deodhar u la pynpaw ruh ba ha ka jingkren jong u ha katei ka jingïalang ka long beit ha ka niam tynrai bad ka mut ban pynneh pynsah ïa ka jingngeit niam tynrai bad kam mut satia ïa ka niam khristan.
U la kdew ruh ïa ki arphew snem ka jingtrei jong u ha ka seng My Home India da kaba ong ba ki la ai jingïarap da ki hajar ngut ki samla khristan na ka thain shatei lam-mihngi jong ka Ri.
“Lyngba kane ka juh ka seng ngi ju pynlong ruh ïa ki lehkmen Khristmas na ka bynta ki khun samla khristan kiba im jngai nala iing ha kylleng ka ri India,” u la thoh bad bynrap ba ki la pynlong teng ruh ïa ka prokram ha iing sah jong u Symbud Myntri Rangbahduh barim ka Ri.
Na ka liang jong u, u la pynpaw ïa ka jingsngewsih kaba jur na ka bynta ka jingpynmong bad pynsngewsih bad ong ba u kular ban wanrah ïa ka jingïatylli, ka jingsuk bad ka jingieid jong baroh.
