Kynnoh ka VPP ba ka jingïap u Dr. Syngkon ka pyni ïa ka jinglong ba shisha ki jaka ai jingsumar

Shillong, Rymphang 25 : U President bad MLA jong ka Voice of the People Party (VPP) Bah Ardent Miller Basaïawmoit u la ong ba ka jingïap jong u MP ka Shillong, Dr Ricky AJ Syngkon ka pyni ïa ka jingtlot ki jaka ai jingsumar ha ka jylla da kaba kdew ruh ïa ka kaiphod tohkit jong ka sorkar bad ka jingkren u MLA ka thain haba ïadei bad ka jinglong jingman jong ka jaka sumar ha Mawiong CHC.
“Nga tharai ba phi la ïohi ïa ka kaiphod jong ka jingtohkit ba la phah da ka sorkar bad phi la ïohi ïa kaei kaba u MLA ka thaiñ u la ong shaphang ka jinglong jingman jong katei ka CHC. Kane hi ka la kdew lut ïa ka jingshisha ïa ka jinglong ki jaka sumar ha Meghalaya,” u la ong.
Haba kylli halor ka jingbym don doktor ha ka CHC, une u nongmihkhmat um shym la treh ban kren ei ei halor katei ka bynta.
“Hynrei kaei kaba ngi kwah ban kren ka long kumno ka sorkar ka pynïaid ïa kine ki jaka ai jingsumar bad kumno ka sorkar ka pynbiang ïa ki nongtrei. Lymda ka sorkar ka pynbiang ïa ka jingdon ki nongtrei, ki jingdonkam jong ki jaka ai jingsumar bad CHC kumta ngam ïohi ba ngin ïaid lait ban kren na kano kano ka phang ban ïatai,” u la ong.