Hajrong eh ka Meghalaya ha ka jingdon kiba don HIV, 10293 ngut kiba dang shah sumar

By Mawphor Editor On Feb 26, 2026

Diagnostician holding in hand a positive HIV test.

Shillong, Rymphang 25 : Ka Jylla Meghalaya ka don mynta ha khliehduh ha ka Ri ha ka jingdon ki briew kiba don ïa u khñiang HIV, bad mynta kumba 10,293 ngut ki dang don ha ka jingshah sumar hadien ba ka sorkar ka la pynbna ïa ka song jingïarap sumar kaba 25klur tyngka.
Ïa kane la ïathuh da u Myntri ka tnad ka Koit ka Khiah ka jylla Bah Wailadmiki Shylla da kaba pyntip ruh ba kane ka mangtyngka ba 25 klur tyngka ka dei na ka bynta ka snem treikam kaba 5 snem da ka thong ban ïakhun ïa ka jingpang HIV/AIDS ha ka jylla.
U Myntri haba jubab halor ka jingkylli ba wanrah da ka MLA jong ka Gambegre, ka Dr. Mehtab Chandee Sangma u la pyntip ruh ba ka jingdon ki briew kiba ïap na ka daw jong kane ka jingpang ha ki 10 snem ka la kot sha ka 749 ngut ha kaba ka East Khasi Hills Hills ka la kot sha ka 435 ngut bud sa ka West Jainta Hills da ki 123 ngut bad East Jaintia da ki 90 ngut.
Nangta ka Ri Bhoi da ki 51 ngut, ka Eastern West Khasi Hills 16, West Khasi Hills 8 ngut, South West Khasi Hills 7 ngut, West Garo Hills 9, East Garo Hills 4, South Garo Hills 3, North Garo Hills 1 bad South West Garo Hills 2 ngut.
“Ka long kaba donkam ruh ban tip ba baroh ki jingïap ba la pyntip la pynshong nongrim ha ki jingpang ba ïoh na ka opportunistic infections (OIs) bad ym shym la don kano kano ka jingïap ba la pyntip ba ka dei na ka jingpang HIV/AIDS,” u la ong.
Haba ka Mehtab ka la kylli halor ka jingnang kiew kiba ïoh ïa ka jingpang, u Myntri u la ai ka jubab da kaba ong, “Ka jingeh kaba khraw tam kaba ka tnad ka ïakynduh katkum ka HIV and AIDS (Preventive and Control) Act , ka long ba ïa kiba ïoh HIV hap ban buh rieh bad ïa ki test ym lah ban leh khlem ka jingmynjur jong u briew uba paw, bad kumta ngim lah ban pynbor ïa ki briew ban dih dawai.”
Shuh shuh u ong ruh ba nalor kata, ka jingpeit bein ki briew ka treikam bha kaba pynlong ïa ki briew ban salia ban wan shakhmat ban phah test. Tangba u ong ba hapdeng kine baroh, ka tnad ka la pynjur ka jingai jingpynshai ban pynshlur ïa ki paidbah ba kin pdiang ïa ki jingshah sumar.
Ha kajuh ka por u la ai ka jingïaroh ïa u Myntri Rangbah ka Jylla bad ka Kynhun Myntri baroh kawei halor ka jingmynjur ïa ka Mission treikam ba san snem ban ïakhun ïa ka jingkiew ka jingpang HIV/AIDS.