Kot `1100 klur tyngka ai ram ka Sorkar sha ki 53,000 tylli ki SHG 95% kiba siew ïathuh u CM

By Mawphor Editor On Feb 26, 2026

Shillong, Rymphang 25 : U Myntri Rangbah ka Jylla Conrad K Sangma ula pyntip ha ïing Dorbar Thaw Aiñ mynta ka Sngi Balang, ba ka jingdon ki Self Help Group ha Meghalaya kala kiew na ka 4000-5000 ha u snem 2018-19 sha ka 53,000 tylli kat haduh mynta, bad ka jingairam kala kot kumba 1,100 klur tyngka kaba kynthup ïa 90% ki longïing. Kiba siew ia ka ram ruh ki long 95 %.
U la iathuh “Kumba 10-15 ngut ki kynthei ki donkam ha ka ban thaw ïa ka SHG, ym donkam satia ban register” ong u Myntri Rangbah haba batai ba ka Meghalaya State Rural Livelihood Society (MSRLS) ka la ïarap ban pynïadei kam bad ki Bank. Ym kum ki nongshim ram shimet kiba hap ban buh bynda, “Haba ki leit da ka kynhun, kim donkam satia ban buh bynda,ki lah ban plie ïa ka bank account bad thaw ïa ka SHG” ha kaba ka jingaisut ïa ka ram ka long 7 %.
“95% na ki ram la siew ha ka por kaba biang da ki SHG bapher bapher” ula ong haba pyntip ba ki Bank ki la pynlait haduh 733 klur tyngka sha ki kynhun bad palat 40,888 tylli ki SHG kila siew ïa ka ram ha ka por kaba dei.
Baroh lang, u iathuh, jan kumba 1,100 klur tyngka ka pisa ka la don bad ki SHG, kaba ai jingmyntoi ïa palat 53000 tylli ki kynhun ki Kynthei, ha kaba 70% ki dei ki ram na Bank.
U Conrad ula ai ka jingïaroh ïa ka kynhun ka MSRLS bad ong “Ki Ophisar ki la trei miet la bad sngi bad ka la don shisha ka jingïaleh ki kynthei ban seng kam ha ki shnong ki thaw”.
U bynrap ba ka jingdon dkhot kala kiew na ka 40,000 ki kynthei ha ki phra snem ba la leit sha ka 5.8 lak mynta, bad ka jingairam kala kiew na ka 100 klur tyngka kumba kaba long mynta.
Haba jubab ïa ka jingong u MLA ka Mawlai ïa ka jingduna ki SHG ha Mawlai, u Myntri Rangbah ula ong ba ka jingthaw ïa ki SHG ka dei ka mon lajong. “Ngi hap ban kynmaw ba ka jingthaw ïa ki SHG ka shong beit ha ki briew kiba kwah ban ïatreilang, ki jingpyrshang ki la don ha manla ki block”.
Halor ka jingpynkhlaiñ ïa ka kamai kajih, u Conrad ula ïathuh ba 42,323 ki dkhot ki la long “Lakhpatis” bad ka Sorkar kala ïaleh ban ïarap pynlong ïa ki kum ki “millionaires ba don pisa 10 lak”.