SAITSOHPEN, Rymphang 25: Ka Seng Samla Saitsohpen bad ka Sohra Police Combine ki la jop ïa la ki jong ki jingïalehkai jong ka lympung 5th District League T20 Cricket Tournament 2026 ba la pynïaid da ka East Khasi Hills Cricket Association, hynne ka sngi Balang.
Ki ar tylli ki jingïalehkai hynne ka sngi la sakhi ïa ka Seng Samla Saitsohpen kaba la jop da 6 wiket ïa ka Mawmluh Cricket Club, nangta ka Sohra Police Combine ka la pynliem noh da 80 ron ïa ka Saitsohpen Veteran Legend.
Ha ka jingïalehkai ba nyngkong, ka Mawmluh ka la rai ban tied nyngkong hadien ba jop ïa ka jingkynting pisa (toss). Ka Seng Samla Saitsohpen ka la lah ban khanglad ïa ka Mawmluh tang na ka bynta 118 ron bad pynhap 9 wiket haki 20 ober. U Aiban Tyngshain Rajee u la ïohlad ban noh synñiang 20 ron naki 21 bol, katba u Dame Kharmalki u la khur 3/26 naki 4 ober.
Haba jubab, ka la shimpor tang 13.2 ober ïa ka Seng Samla Saitsohpen ba kan kamai 119 ron da kaba hap tang 4 wiket, ha kaba u Mebankyrshan Allya u la lamkhmat ha ka tied ban kamai 56 ron naki 29 bol. U Dakerlang Sohkhlet u la khur 2/18 naki 3 ober.
Ha kaba kut ïa ka khusnam Player of the Match la khur da u Dame Kharmalki.
Ha ka jingïalehkai kaba bud, u Rector Iawim u la khyrwit 109 ron naki 59 bol kaba la ïarap ïa ka Sohra Police Combine ban buh ïa ka thong kaba 187/5 haki 20 ober.
U Habaioh Riahtam jong ka Saitsohpen Veteran Legend u la khur 2/16 naki 2 ober, hynrei ka kynhun ka la pynkut ïa ka pali tied tang na ka bynta 107/6 haki 20 ober, bad dei tang u Ivan Maxwell uba kham seisoh da kaba kamai 24 ron naki 30 bol.
U Bantiplang Kharshiing u la khur 3/20 naki 4 ober ha kaba ka Sohra Police Combine ka la jop da 80 ron. Ha kaba kut ïa ka khusnam Player of the Match la khur da u Rector Iawim.
