Jowai, Rymphang 23: Ka kynhun ïalehkai Cricket jong ka Ummulong SC kala jop ïaka Wahiajer SC da 37 run haka jingïakhun mynta ka sngi 23 tarik u Rymphang haka District Cricket League 2026 bala pynïaid da ka West Jaiñtia Hills District Cricket Association.
Ïa ka jingkynting pisa la jop da ka Ummulong SC kaba la jied ban tied nyngkong, da kaba kamai 218 runs na ki 35 Over bad hap 6 wickets. U Welmanson Passah (C) ula lah ban kamai marwei 48 Run na ki 27 bol kynthup 4 tylli ki 6 Run bad 2 tylli ki 4 Run. U Langmi Bamon ula kamai 31 run khlem out na ki 59 bol kynthup ïa 3 tylli ki 4 run, u Sylvester Mylliempdah ula kamai 29 run na ki 36 bol kynthup ïa 3 tylli ki 4 run, katwa u Heimonlang Lyngdoh ula kamai 28 run khlem out na ki 23 bol kynthup 5 tylli ki 4 run.
Na ka liang ki nong kawang bol ka Wahiajer SC, u Wanjop Suja bad u Heimon Dkhar (C) kila ïoh pynhap mar 2 Wickets.
Ka Wahiajer SC haba wan ban beh ïa ka thong kala la ïoh ban kamai 181 run bad hap lut baroh ki wickets ha ki 32.4 over. U Kitboklang Shylla ula kamai haduh 58 Run na ki 67 bol da kaba ïoh tied 6 tylli ki 4 Run. U Emmi Talang la kamai 24 run na ki 15 bol kynthup kawei ka 6 run bad 4 tylli ki 4 run. U M. Nelson Lamare u nong kawang bol ka Ummulong SC ula ïoh pynhap 4 Wickets na ki 7 Over.
Ïa ka nam Man of the Match la ïoh rah da u Welmanson Passah u nongïalehkai ka Ummulong CC uba kamai bun runs bad pynhap shi wiket.
La pyntip baka jingïalehkai lashai ka sngi 24 tarik kan long hapdeng ka Goodwill Mupliang SC pyrshah ïaka Tympang CC naduh ka por 9 baje mynstep.
