Ngin pynduh noh ïa ka MoU pynbeit pud bad ka Assam lada ngi wan ha ka bor: Mukul

Shillong, Naitung 12: U Dr. Mukul Sangma, Nongïalam jong ka All India Trinamool Congress ha Meghalaya, u la ong ba lada ka Seng jong u ka wan ha ka bor ha u snem 2023 kan pynduh noh ïa ka Memorandum of Understanding (MoU) ba la ïasoi bad ka Assam halor ka jingpynbeit pud.
Haba beiñ ïa kane ka jingïasoi kaba la shu leh khlem pyrkhat sani bha, u Myntri Rangbah barim ka jylla, u la ong ba kane ka soskular kadei kaba ka Meghalaya ka la shu pyndem beit ha ka Assam. “Kane ka MoU kadei kaba ka Meghalaya ka shu shah beit ba ka Assam ba kan leh katba mon, namarkata ka daw ka Assam ka la kmen bha”, la ong u Dr. Mukul, haba ïakren bad ki nongthoh khubor hadien ba la wai ka jingïalang jong ka AITC ha Rongjeng, East Garo Hills.
Da kaba ther tyngeh ïa ka sorkar jong u Conrad Sangma, u Nongïalam jong ka Seng Congress, u la ong ba kane ka jingïasoi bad ka Assam ban ïapynbeit ïa u pud u sam ka la khynñiat ïa kiba bun tylli ki Shnong sha Assam. U la ai nuksa ïa ki Shnong ha ka Hima Nongspung, nangta ka Raid Marwet bad kiwei kiwei.
Shuh shuh, u la ong ruh ba ka sorkar u Conrad kam shym la sngewthuh bha halor ki jaka ba ïakajia namar ka la ai da ka map kaba la dro naduh ka por jong ka sorkar phareng.
U la maham ruh ba ka sorkar Meghalaya bad ka sorkar Assam, kam dei ban byrngem bad pynbor ïa ki paidbah ba kin leit sha Assam ne ym dei ban byrngem ïaki haba ki pynlong ïa ka jingpyrshah ïa kane ka jingpynbeit pud.
Haba kren ha ka jingïalang ban pynrung dkhot sha ka Seng ha Rongjeng, u Dr. Mukul u la ther tyngeh ïa ka NPP da kaba ong ba ka long tang ka Seng tyngshop jong ka BJP, kaba long ka Seng kaba ñion beiñ ïa ki rit paid, khamtam ïa ki Khristan. U la ther ruh ïa ka sorkar MDA hapoh ka jingïalam ka NPP ba kadei ka sorkar kaba bamsap, kaba leh bun ki kam beaiñ bad thombor ïa ki paidbah.