“Ym don doktor, u don ha ïing” pyrta kawei ka longkmie napoh ka khyrdop CHC Mawïong

Shillong, Rymphang 22: Ka jingleit jngoh ïa ka Mawlai Mawiong Community Health Centre (CHC) ha ka por 7 baje janmiet ha ka sngi saitjaiñ (Rymphang 21) ban sngewthuh ïa ka jingpynkhreh jong ki nongtrei ka koit ka khiah hadien ka jingkhlad noh u MP ka Shillong u Dr. Ricky AJ Syngkon ka la pynpaw ïa ka jingleh thurmur namar ba ka khyrdop ka la khang khyrdep.
Ïa une u MP jong ka Shillong constituency la rah nyngkong sha CHC na madan ïalehkai phutbol, hadien ba u la kyllon ha ka 19 tarik u Rymphang.
Haba ki nongthoh khubor ki la leit jngoh ha ka por 7 baje janmiet jong ka sngi Saitjain, kawei ka kynthei na shapoh khyrdop ka la pyrta,” Ym don doktor, u don ha ïing”.
Kumjuh ruh ha ka por ba la pynkit mar mar ïa u MP ha katei ka CHC ym shym la don doktor satia.Hadien kane la pynkit noh ïa u MP sha Robert’s Hospital, Jaiaw, ha kaba la pynbna ba u la khlad noh.
Ka sorkar jylla kam pat shim khia ei ei pyrshah ïa ki jingbakla ne ka jingduna ha kane ka CHC.
Shwa ia kane, ha ka 20 tarik Rymphang, u heh ophisar jong ka tnad ka koit ka khiah u Sampath Kumar u la ong ba u dang pan ïa ka kaiphod kaba ïadei bad ka jingsumar jong u MP.
Haba kylli, u myntri ka tnad ka koit ka khiah u Bah Wailadmiki Shylla u la ong ba ka sorkar ka dang ap ïa ka jubab na ki heh ka tnad ka koit ka khiah ka district.
Halor ka sienjam ban leh namar ba ka CHC ha Mawiong kam don doktor namar ba ka sngi Saitjain ka dei ka sngi kaba lai hadien ka jingkhlad noh jong u MP, u myntri u la jubab, “Ngin sa ai da ka jingpynbna ha ki lad pathai khubor.”