New Delhi, Rymphang 22 : New Delhi, Rymphang 22 : Ka Nongthoh Khubor na Meghalaya, Kong Aihun L Tron kaba dei ka Correspondent jong u Mawphor bad Highland Post ha East Jaintia Hills myn ha ka sngi Saitjain ka la shah pynkup burom da ka khusnam ‘Best Journalist of Meghalaya Award’ ha ka 20th Media Excellence Awards 2026 kaba la pynlong da ka Media Federation of India ha nongbah New Delhi.
Ïa kane ka khusnam la sam da u Prof. Sanjay Dwivedi, Director General barim jong ka Indian Institute of Mass Communication (IIMC), senior journalist Prateek Trivedi bad ruh u Dr. LP Sharma, Deputy Director General jong ka National Informatics Centre (NIC) ha ka jingïalang kaba long ha PLB Auditorium, ITO, New Delhi hapoh ka phang pdeng “Ek Bharat Shreshtha Bharat.”
Kane ka khusnam na ka Media Federation of India ka long kum ka dak ka jingithuh ïa ka jingnoh synñiang jong kane ka Nongthoh Khubor jong u Mawphor ha ka imlang sahlang, la ka long ha kaba ïadei bad ki paidbah bad kumjuh wat ha ki kam kiba ïa dei bad ka sain pyrthei.
Ha kane ka prokram la donlang ruh naduh u National President ka Federation u Arun Sharma, General Secretary Dharmveer Anand, Senior Vice President Ashish K. Singh, bad kumjuh ki nongthoh khubor na palat 24 tylli ki jylla.
Ka Kong Aihun ka dei kaba shong ba sah ha Umlyngka, Upper Shillong hynrei ka trei pat kum ka Senior Correspondent jong u Mawphor bad Highland Post na East Jaintia Hills District.
Kum ka nongthoh khubor kaba la don palat 11 snem ha ka kam ka la don ruh ka bynta kaba khraw ban noh synniang ha ka imlang sahlang khamtam haba ïadei bad ki nongshong shnong jong katei ka distrik.
Shwa kane, ka Kong Aihun ka la ïoh pdiang ruh ïa ka khusnam na ka ophis u Deputy Commissioner ka East Jaintia Hills District, Khliehriat ha ka sngi ba ki rakhe ïa ka Independence Day ha u snem 2022. Ka la ïoh ruh ïa ka jingpynkup burom na ka Sonapyrdi Tourism and Economic Development Society (STEDS) halor ka jingnoh synniang jong ka ban kyntiew ïa ka kam jngohkai pyrthei ha katei ka thain.
Na ka liang jong ka Kong Aihun ka la pynpaw ba kane ka khusnam kan ai mynsiem shuh shuh ba kan lah ban ai shuh shuh ïa ka jingshakri kaba kham bha ha ka imlang sahlang.
“Nga kwah ruh ban ai ka jingkhublei kaba kyrpang ïa ka kynhun jong u Mawphor hapoh ka jingïalam jong i Editor, nangta ka Management kaba ju ai mynsiem bad pynshlur ïanga bad khamtam ïa baroh kiba la kyrshan ha kane ka jingïaid lynti jongnga kum ka nongthoh khubor. Nga kwah ruh ban ai khublei ïa ki bor distrik jong ka East Jaintia Hills naduh DC, SP, ki Nongïalam Shnong, ki nongïalam jong ki kynhun bapher kiba la ai ka jingïatrei lang na ka por sha ka por.”
