Shillong, Rymphang 22 : Namar ka jingpoi da ka umbam kaba jaboh bad ka bym i long shuh ban pyndonkam ban shet ban tiew na ka liang u Rangbah Shnong ka Dymmiew, Bah M Marbaniang mardor u la phah test ïa kane ka um sha State Food Testing Laboratory, Commissionerate of Food Safety Pasteur Hills, Shillong.
Katkum ka jingïathuh jong u Rangbah Shnong la ong ba katei ka um kaba ki ïoh pdiang ha iing ka dei kaba jngut bad kaba sma bad kaba la pynartatien wat ban pyndonkam ruh.
Ha ka jingïakren bad u Rangbah Shnong la ïathuh ba kane ka jingjia ka la pynkyndit namar ki la don bun tylli ki longiing kiba ïoh pdiang da ka um jaboh.
Kumta u la ong ba ha ka shnong ki don lai tylli ki top um, kumta mynta ki hap ban wad ïa ka tynrai kumno katei ka um jaboh ka poi ha ki iing briew.
“Mardor ngi la pyntip sha ki bor jong ka Municipal bad ki ruh ki la wan bad lap ba ka um kaba mih na ka kor sorkari ka long kaba khuid kaba dei kajuh ka top kaba poi pat sha ka iing jongngi,” u la ong.
Shuh shuh u la ïathuh ba wat haba ki phah peit ha u nongshna um u la pyntip ïa ki ba kam don satia kano kano ka jingpeit ne jinglait ki pipe kiba poi sha iing jong ki.
“Ngi la dap da ka jinglyngoh kaba khraw kumno ka um kaba poi ha iing ka long kaba jngut bad kaba sma. Kumta ngi la kyntu lem ïa ki bor ba dei peit ba kin khmih bad ïarap lem ïangi ban ïoh da ka um kaba khuid bad ka bym don jingsma,” u la ong.
Une u Rangbah Shnong u la ïathuh ruh ba halor kane ka jingjïa ki la leit ruh ban peit ïa ka lynti ïaid jong kine ki pipe ter ter haduh ban da poi sha ka top um.
Kumta, u la kyntu jur ïa ki bor ba dei peit ba kin shimkhia lem kham kloi namar ka um kadei ka bynta kaba kongsan tam ha ka jingim briew kaba man la ka sngi.
