Shillong, Naitung, 12: Ki nongtrei jong ka EMRI-108 kiba don hapoh ka shatri jong ka Meghalaya EMRI Workers Union (MEMRIWU) ha ka sngi Baar ki la ai por tang hapoh 72 kynta ïa ka Sorkar Jylla ba kan weng noh ïa ka kompeni GVK na Meghalaya bad ban shimti hi noh ha lade ban pynïaid ïa ka EMRI-108 khnang ba ki paidbah nongshong shnong kin dup ïoh ïa ka jingshakri kaba paka.
“Ngin ladep ai por ar taiew kham mynshwa ïa ka Sorkar Jylla bad ha ka jingïalang mynta ka sngi ngi la shim ïa ka rai ban ai por tang 72 kynta ka ban sdang naduh ka por 12 baje shiteng synñia bad hadien lai sngi lada ka Sorkar kam khot ïakren ïa ngi bad kam leh ïa kaba donkam, ngim banse ban pynlong da ka jingïakhih kaba tyngeh wat ban sangeh ïa ka jingshakri,” ong ka President ka MEMRIWU ka Kong Microlina Syiemlieh ha ka jingïakren bad ki lad pathai khubor.
“Ngi la thait ban kren ïa kajuh shi kajuh namarba ka Sorkar kam sngap ïa ngi. Ka jingpynlong kamkai jong ka Sorkar ka la long shaba palat bad ka Sorkar ka la leh khyllung khynnah shaba palat,” ong ka Kong Syiemlieh.
“Ngi shu pynbna sha ki paidbah ba katne snem ngi la pyrkhat ïa ki paidbah bad mynta ka kynti ruh ngi pyrkhat ïa ki paidbah bad kaei ka ban jia nangne shakhmat ka long na ka bynta ban pynbha ïa ka jingshakri namarba katba nang mih ki sngi, kane ka jingshakri jong ka GVK ka dang hiar na ka jingleh jong ka Sorkar bad na ka jingleh jong ka kompeni namarba ka Sorkar ka pynlut katba ka jingïohnong ka dei ka kompeni,”ka la ong.
Haba ïathuh ba u Myntri ka Koit ka Khiah ka Sorkar Jylla u James PK Sangma u la kular ban pynkut noh ïa ka soskular bad ka GVK, kane ka nongïalam jong ka MEMRIWU ka la ong, “u James Sangma leilei u la ong ba ngim (sorkar) shahniah shuh ïa kane ka kompeni bad ngin ym pynjlan shuh ïa ka kontrak bad ngi lap ha ka kaiphod ba ka jingshakri jong ka GVK ki bun ki jingduna hynrei wat hadien ba la lap ïa ka jingduna hynrei ka Sorkar ka dang pynjlan ïa ka jingshakri (jong ka GVK).”
“Kum ka Union ngi la khmihlynti ba ka Sorkar Jylla kan leh eiei tang shu mih ka 1 tarik, Naitung, tangba ka Sorkar kam leh eiei haduh mynta. Ngi shu kyrpad ïa ki paidbah ba kin ïaishah bad kane kan long ka sien kaba khatduh ïa ngi ban pyneh namarba lada ngim pyneh ruh ka Sorkar kam leh eiei,” la bynrap ka Kong Syiemlieh.
Shuh shuh ka la ïathuh ruh ba ka Union ka la shim ïa kane ka rai dei namar ka jingmynthi jong ka Sorkar.
“Kumba ka Union ka ladep ai shithi sha ki 60 ngut ki MLA, phi (MLA) ruh phi hap ban shim ïa ka jingkitkhlieh ha ki Constituency ki jong phi namarba kiba mad ïa ki jingjynjar ki dei ki paidbah jong phi. Phi dei ban leh eiei halor kane ka jingdawa jong ngi,” ka la ong.
Katkum ka jingïathuh jong ka Kong Syiemlieh, ka MEMRIWU ka la aipor ïa ka Sorkar MDA naduh u snem 2018-2019 ban pynkut noh ïa ka soskular. “Ngi la ïaishah bad lada ngi shim ïa kane ka sienjam kam dei shuh ka jingbakla jong ngi,” ka la ong.
