Kan dang shim por ïa ka VPP ban suhthied ha Garo Hills, kan don jingkyrmen ïa ka jingieid ïa u Dr Ricky

Kumba la ïohi ha ki social media lah bun palat ki briew kiba ai jingkynthoh halor ka jingkhlad noh jong u MP ka Shillong parliamentary u Dr. Ricky ha kane ka por kaba mynta bad kumba la ïohi ha ki jingkynthoh kiba bun bha ki nongshong shnong ka thaiñ Garo Hills ki la pynpaw ïa ka jingsngew lem bad ki la da pynpaw ruh ïa ka jingdonkam ban ïoh ïa kum une u Nongïalam jong ka seng Prah.
Ka elekshon sha Garo hills District Council, kan long ha ka 10 tarik Ïaïong 2026 bad da katei ka jingpynbna jong ka sorkar jylla, la ïohi, ba ki seng saiñ pyrthei, ki la sdang ban sei madan ïa ki kyrtong jong ki, ki ban ïakhun ïa katei ka elekshon; hynrei na ka liang jong ka seng VPP lane ka seng prah, la ïohi shai, ba kam don mon satia ban leit ïa pyni bor sha Garo hills, ha kane ka elekshon MDC, namar ba kam shym la leit ban lum ban lang, ha ki khyndiat bnai ba ladep sha ki bynta jong ka Garo hills.
Katei ka rai jong ka seng VPP, ban nym sei kyrtong ha ka elekshon MDC ha Garo hills, ka pyni shai namarkata, ba katei ka seng kan trei shitom bad kan duriap ïalade ban pynkhlaiñ tyngeh ha ki bynta jong ka Khasi bad Jaiñtia hills lane ha ri Khasi baroh kawei bad katei kan dei ruh ka thong kaba kin buh ha khmat duh ha ka elekshon MLA 2028, ka ban long sa tang ar snem duna mynta bad katei ka pyni ruh ba ka seng VPP, kan trei tyngeh ha ki 36 tylli ki Constituency jong ka Khasi bad Jaiñtia hills.
Ka rai jong ka VPP ka long kaba donkam bha, namar ba katei ka seng, hi ka ïeng halor ka kyrteng jong U Bah Ardent Miller Basaïawmoit bad kumta ba un ïaid un ïeng ha ki bynta jong ka Khasi bad Jaiñtia hills, kam da eh than, sha ki shnong ki thaw jong ki 36 tylli ki Constituency, hynrei lada un leit un wan shiphang sha Khasi bad shiphang sha Garo, kumta katei kan buh ïa ka jingeh kaba khraw ïa ki nongtrei jong katei ka seng bad kumjuh ïa ki kyrtong bad ïa ki paidbah, kiba ieid ïa katei ka seng kaba dang thymmai.
Kumba ka seng VPP, ka la jop don burom ha ka elekshon MP, ha u snem 2024 bad nangta ka la leh bha ruh ha ka elekshon MDC 2025, kumta ka long kaba donkam eh, ba kan trei borbah ha kito ki Constituency kiba ka khlaiñ, khnang ba kan ïoh ban leh bha ha ka elekshon MLA, ka ban long sa ar snem mynta.
Wat la ka jingïaleh kan long kaba ïatan tyllai bha, hynrei ki dak ki shin ki kdew, kumba ka NPP, kan hap ban ïakhun ïa ka elekshon MLA, ïa ki lai tylli ki seng kiba khlaiñ bha bad ki ban pynduh thiah pynduh dem ïa U Conrad Sangma bad kitei ki kynthup ïa ka VPP bad ka Congress na Khasi, Jaiñtia Hills bad nangta sa ka kynhun jong U Mukul Sangma bad ka Congress na Garo hills.
Kam kut tang katta, hynrei ka jingshisha ka paw tyngkreiñ, ba ka seng BJP, kan leh tyngeh bha ha kane ka kynti jong u snem 2028 bad lada kan long kumta, ka jingïakhun kan long kaba jwat shibun eh ïa ka NPP bad ïa u heh duh jong ka, U Conrad Sangma ha kane ka sien ka ba wan, khlem da kheiñ shuh ïa ki kynhun synrop jong u, lada dei ka UDP, HSPDP kiba la nang ïap stai bad kiba lah ruh ban duh jait syndon, ha ki ar snem ban sa wan.
Haba ïakren ïa ka elekshon, kumba la ïohi ïa ka jingieid jong u paidbah ïa u (L) Dr. Ricky naduh ka Sngi ba la tip ba u la leit noh na kane ka pyrthei la ïohi ba bun byllien ngut ki paidbah ki la ïamih ban leit synran bad ban sngewlem shaduh sha hospital bad kumjuh ruh sha la ïing, kumta lah ban ong ba ha elekshon shiteng samoi na ka bynta ban jied MP bathymmai khlem pep ki paidbah kin sa ai biang ka jingkyrshan ïa ka VPP namarba ki pyni ka jingieid ïa u Dr. Ricky Syngkon.
Lah ruh ban ong ba ka seng VPP ha kane ka kynti kaba mynta ka dang ïoh bha ïa ka lyer haba ïakren bad ki kam ilekshon naba ha kane ka kynti ka long kawei na ki seng kaba dang don ka jingkyrmen ha kaba ïadei bad ki kam elekshon.