Sanbor: Da ki piknik bad ki DJ pynbiej ki heh spah por elekshon, ïalade pat don paki dulan wat sha bar ri
Shillong, Naitung 12: U Bah Sanbor Shullai uba dei u dkhot barim jong ka FKJGP bad KSU ha ki snem kiba la dep uba la bat pat mynta kum u Myntri ha ka sorkar jylla ha ka 12 tarik Naitung 2022 u la ther tyngeh ïa ki heh spah kiba wan ïakhun ilekshon na bynta ban ïoh ïa ka jingmyntoi shimet jong ki. U Bah Sanbor u la ong ruh ba bun ki heh spah na rilum Jaintia kiba leit ïakhun ilekshon sha Them Ribhoi ban ïoh lum spah shuh shuh katba ïa u paidbah pat ki pynbieit tang da ki piknik, ki DJ bad ki jingshad jingrwai. Shuh shuh ka la kyrpad ïa ki samla bad ki seng bhalang kin husiar ïa ka ki heh spah bad ban ym shah satia wat tang ba kin wan kanbas ilekshon.
Haba ai jingkren ha ka sngi pyntian smai ïa ki nongïalam ba thymmai ka seng FKJGP u Bah Sanbor u la khot ruh ïa ki nongïalam seng bhalang ba kin wan ban ïa syllok bad u sop sop ruh ban ïa tai bad saiñdur kumno ban leit tynruh ïa ka sorkar pdeng wat shaduh sha kamra thiah u Myntri Rangbahduh ka ri u Narendra Modi bad ruh sha kamra thiah u Myntri ka tnad Poh ïing ka sorkar pdeng u Amit Shah.
Shuh shuh u Bah Sanbor u la ïathuh ba lada peit ba kiba nud ban ïalam ïa ka seng bhalang dei tang kiba satar bad kiba ym tieng ban ïakhun bad ki pulit CRP.
Haba kren halor ka jingjop pat jong u na South Shillong u Bah Sanbor u ong “Ka jingkyrkhu kaba rieh la kha ïa u ha Laban namar lada ym dei ba kha ha Laban kin dei beit ki dkhar kiba mihkhmat ïa ka Laban u dkhar”
“Donbok ba jop ma nga na Laban bad ba nga lah ban pynrem ïa u nongshun ba khraw tam ka jaidbynriew uba la ai da ka case ban pynduh noh ïa ka district council ruh bad ïa uta u nongshun ka jaidbynriew nga la shoh teng ruh ha Shillong Club ” ïathuh u Bah Sanbor.
Haba bynrap lang u Bah Titos Chyne uba dei ruh u nongseng lang ka FKJGP uba la bat ruh kum u CEM jong ka KHADC u la ïathuh ba ka jingpyrshang kiba nabar ban wan pyntlot ïa ka KHADC ka dei kaei kaei kaba buh jingma ïa ka jaidbynriew da kaba kular ruh ba na ka liang ka KHADC kan bteng ban long ka stieh jong ka jaidbynriew kat kum ki iktiar ba la pynkup da ka Riti Synshar.