Jowai, Naitung 12: Ka kynhun pulit jong ka Ummulong Beat House mynta ka step shiteng synñia haka por kumba 1 baje shiteng, kila ïoh kurup ïa u kynja bala dep song bha haduh 80 tylli, uba don ka jingkhia 1168.182 kgs bad uba shong dor haduh T.3.5 klur na kawei ka trok (container) kaba don ïa u Registration No RJ.10 GB 1424 kaba wan na thaiñ Jowai ban leit sha Guwahati.
La ïoh kurup ïa utei u kynja katba ki pulit ki dang pynlong ïa ka jingtalasi ïa ki kali ha ki bynta jong ka Mookyndur Check-point, ki pulit ynda kiba pyrshang ban pynsangeh ïa katei ka trok hynrei katei ka trok kala sangeh kham hashawa katei ka Check point.
Ha katei ka por ba kik pulit ki dang pynlong ka jingtalasi ka dang dum bha ka miet, ki ar ngut ki briew kiba ñiah ïa katei ka trok kila phet krad sha khlaw bad eh syndon ïa katei ka trok katei ka jaka.
Halor kane na ka liang ki pulit ka Ummulong Beat House kila pyntip mar mar sha ki pulit ka Anti-Narcotics Task Force (ANTF) Jowai ban leh ïa kaba donkam, ïa utei u Kynja ba la ïoh kurup la register kes ha Jowai PS katkum ka C/No. 92(07)22 U/S 21(c)/60(3) NDPS Act bad ka jingtohkit kan dang ïaid shakhmat.
Katba na ka liang u Director General of Police ka jylla u Dr. Lajja Ram Bishnoi, IPS hadien ka jingïoh kurup ïa u Kynja, ula ai ka jingïaroh bad pynbna ban un ai ka khusnam sha kitei ki pulit kiba trei shitom ïa ka kam wat ha ka por shiteng synñia.
Ka tnad pulit na ka por sha ka por kala pyrshang ban teh lakam ïa ka kam khaïi ïa ki mar pynbuaid kiba kynthup naduh u Drug, u Kynja, ka Kyiad bad kiwei de.
