Shillong, Naitung 12: Ka tnad Pulit jong ka jylla hadien ka jingshah kynnoh ba ka la leh bun ki jingbakla ha kaba ïadei bad ka jingshah pynïap ki arngut ki shipara ha Nongrah ha la u jong u kpa, ka la shimkhia ban pynbeit ïa ki jingbakla da kaba wanrah bad pynkynmaw ïa ki kam kiba ki Pulit kidei ban leh haba jia kum kine ki jingjia.
Kane ka jingshimkhia ka tnad Pulit ka long lyngba ka Coordination Committee kaba la pynlong dang shen ha Conference Hall jong ka ophis u DGP, ha kaba la ïadon lang ki heh Pulit, nangta i Chairperson jong ka Meghalaya State Commission for Women, i Kong Phidalia Toi, i Chairpesron jong ka Meghalaya State Commission for the Protection of Child Rights, i Kong Ïamonlang Syiem bad ki Kynhun kiba peit halor ka jingshah thombor bad shah ban beiñ ki Kynthei.
Ka SP jong ka tnad CID, ka Supriya Das, IPS, ka la ai ka jingbatai da kaba pyni artad da ka Power Point ïa ki Standard Operating Procedures (SOP) ba ki Pulit kin hap ban bud haba jia kino kino ki jingjia ba shah thombor ki Khynnah bad ki Kynthei. “Baroh ki Pulit kiba don ha ki thanad kidei ban tip ïa kine ki SOP, khnang ban nym bakla ka jingtreikam”, la ong ka Das.
Shuh ka la ïathuh ruh ba ka tnad Pulit ka la pynlong ïa ki Awareness Programme bapher bapher ban pynsngewthuh ym tang ïa ki Pulit, hynrei ïa ki khynnah skul bad kumjuh ruh ïa ki paidbah.
