AFC Women’s Asian Cup 2026: Sngew sarong ka MFA ba shah jied ka Sanfida Nongrum ha ka kynhun India

Shillong, Rymphang 21: Ka Meghalaya Football Association (MFA) ka la pynpaw ïa ka jingsngew sarong halor ka jingshah jied jong ka samla Sanfida Nongrum ha ka kynhun ki thei ïalehkai ba la rangbah (Senior) jong ka India ka ban aireng ha ka lympung AFC Women’s Asian Cup 2026 ha Australia ha u bnai ban wan.
Haba kren halor kane ha ki rynsan social media, u President ka Meghalaya Football Association u bah Hamletson Dohling u la ong ba kadei ka por kaba sngew sarong ïa ka jylla bad ka khyllipmat kaba sah jingkynmaw ha ka histori.
Haba kren beit beit sha ka Sanfida, u la bynrap, “Ka jingïaid lynti jong phi, ka jingtrei shitom bad ka jingngeit ka la ïalam ïa phi shane. Phi rah ym tang ïa ka rong lai rong hynrei ïa ki jingkyrmen bad ki jingangnud jong kiba bun ki khynnah kynthei kiba dang rit sha la ïing kiba tip mynta ba kane ka kyrdan ka long kaba lah ban ïoh. Nga kitbok kitrwiang ïa phi ïa ka bor, ka jingshlur bad ka lympung ba phin kynmaw junom.”
Shuwa kane, ka Sanfida ka la dei shi bynta jong ka kynhun India kaba la leit sha Turkey ha u bnai Kyllalyngkot na ka bynta katto katne tylli ki jingïalehkai paralok pyrshah ïa ki klob jong katei ka ri shuwa ban leit sha Australia katba ka India ka dang pynkhreh ïalade na ka bynta ka lympung jong ka dewbah Asia. Ka la mih madan ha ki katto katne na kitei ki jingïalehkai paralok hynrei ym shym la kheiñ ïa ki kum ki jingïalehkai bar ri. Hynrei ban poi haduh kane ka kyrdan ruh ka la pynlong ïa ka ban thaw ïa ka histori namar haduh mynta ym pat don ka kynthei Meghalaya kaba la ïalehkai na ka bynta ka kynhun ïalehkai ba la rangbah jong ka ri.
Hynnin ka sngi la pynthikna ïa ka kyrteng ha ka kynhun ïalehkai jong ka India da ka coach ka Amelia Valverde. Ka Sanfida, kaba la tip kum ka Polly, ka dei kawei na ki hynriew ngut ki nongïalehkai ki bym pat ïoh mih madan ha ki jingïalehkai bar ri.
Ka Sanfida ka la ïalehkai mynta na ka klob Garhwal United ha ka Indian Women’s League, hynrei ka la mih madan ruh na ka Bangalore United, Sports Odisha, Sirvodem SC bad ha ka kynhun Sub-junior jong ka Meghalaya ha ki por ba ladep. Da kaba don kyrteng ha ka Garhwal, ka la ïoh ruh ban mihkhmat ïa ka Delhi ha ka Senior Women’s National Football Championship.
Ha Meghalaya, ka Sanfida ka la ïarap ïa ka Laitkor sha ka jingjop ha ka Women’s Football League 2024. Bad ha u snem ba ladep, haba ïalehkai na ka Misaka United, ka la ïoh ïa ka nam Top Scorer bad Player of the Tournament ha ka Karnataka Women’s League 2025-26.
Ka India kaba shah thup ha ka Group C, kan sdang ïa ka jingïalehkai ba nyngkong pyrshah ïa ka Vietnam ha ka 04 tarik u Lber ha Perth Rectangular Stadium ha ka por 4:30 baje nohphai sngi, bud sa ka jingïakhun pyrshah ïa ka Japan ha ka 07 tarik u Lber ha kajuh ka por bad kajuh ka jaka. Ka jingïalehkai group stage ba khatduh kan long pyrshah ïa ka Chinese Taipei ha ka 10 tarik u Lber ha Western Sydney Stadium ha ka por 2:30 baje nohphai sngi.
Ki ar tylli ki kynhun kiba wan hakhmat duh na kawei pa kawei ka Group, ryngkat bad ar tylli ki kynhun ba wan kyrdan ba-lai kiba kham kynsai, kin ïohrung sha ka Quarter-final. Ki saw tylli ki kynhun kiba jop ha ka Quarter-final kin ïohrung sha ka FIFA Women’s World Cup Brazil 2027. Ki kynhun kiba khyllem noh ha ka Quarter final kin ïakhun ïa ka play-off na ka bynta ki ar tylli ki jaka ba dang sah kiba la ai sha ka AFC na ka bynta ka World Cup. Ki ar tylli ki kynhun kiba shah rem ha ka play-off kin sa ïoh biang ïa ka lad ban rung sha ka Brazil lyngba ka Play-off Tournament.

Ka thup kyrteng jong ka kynhun India:
Goalkeeper: Panthoi Chanu Elangbam, Shreya Hooda, Sowmiya Narayanasamy
Defender: Astam Oraon, Juli Kishan, Martina Thokchom, Nirmala Devi Phanjoubam, Sanju Yadav, Sarita Yumnam, Shilky Devi Hemam, Sushmita Lepcha, Sweety Devi Ngangbam
Midfielder: Anju Tamang, Aveka Singh, Babina Devi Lisham, Jasoda Munda, Sanfida Nongrum, Sangita Basfore
Forward: Grace Dangmei, Kaviya Pakkirisamy, Lynda Kom Serto, Malavika P, Manisha Kalyan, Pyari Xaxa, Rimpa Haldar, Soumya Guguloth
Support staff: Amelia Valverde (head coach), Crispin Chettri (assistant coach), Priya PV (assistant coach), Eli Ávila (goalkeeping coach), Mario Aguiar (goalkeeping coach), José Sánchez (strength & conditioning coach)

Ka prokram ïalehkai jong ka India ha ka Group C:
04 tarik u Lber: pyrshah ïa ka Vietnam ha Perth Rectangular Stadium ha ka por 4:30 janmiet
07 tarik u Lber: pyrshah ïa ka Japan ha Perth Rectangular Stadium ha ka por 4:30 janmiet
10 tarik u Lber: pyrshah ïa ka Chinese Taipei ha Western Sydney Stadium ha ka por 2:30 nohphai sngi.