Shillong, Naitung 12 : Ka ïing bishar High Court jongka jylla ka la rai ban ailad ïa kito ki kompani Coke kiba shah ktah na ka hukum ban pynpra ïa baroh ki karkhana ba la dep pynmih dang shen ba kin ai jubab ne pynshai hakhmat ka ïing bishar. La shim ïa kane ka rai hadien ba ka ïing bishar Supreme Court ka la pynsangeh shwa ïa ka hukum jongka ïing bishar HC ka jylla hadien ba ki la ujor ba kim shym la ïoh lad ban ai kano kano ruh ka jingpynshai.
Ka ïing Bishar ba la shong da baroh ki nongbishar hapoh ka jingïalam u Chief Justice Sanjib Banerjee ka la ong “ Namar ba ki nongujor ki la ujor sha ka ïing bishar Supreme Court ba kim ïoh lad ban ai jubab ne jingpynshai hakhmat ka ïing bishar High Count kumta ka ïing bishar ka la ailad ïa ka kompani ba la ïasaid da u nongïasaid aiñ SP Mahanta ban ai jubab ne jingpynshai hapoh shitaiew. Kane ka long halor ka hukum kaba la pynmih ha ka 24 tarik u Jymmang 2022 bad kumjuh ruh ïa kaei kaba la ai jingmut da u nongbishar ba la shongthait u Justice Katakey kat kum ka kaiphod ha ka 23 tarik Jymmang 2022.
Ha ka 27 tarik Jylliew ka ïing bishar Supreme Court ka la pynsangeh shwa shipor ïa ka rai jongka ïing bishar High Court ka Meghalaya ban phah pynpra noh ïa baroh ki karkhana Coke hadien ba ka la bishar ïa ka jingujor na kawei ka kompani Coke na kane ka jylla.
Kumta ka ïing bishar High Court ka la ailad ïa kine ki nongujor ba kin ai jubab hakhmat ka ïing bishar kaei kaba ki shah ktah na katei ka hukum ba la pynmih ha ka 24 tarik Jymmang namar ka ïing bishar kala pdiang ïa ka jinglap bad kaiphod jong u Justice BP Katakey kaba u la ai ha ka 23 tarik Jymmang.
Ha katei ka jingujor sha ka ïing bishar Supreme Court ki nongujor ki la pynpaw ba ka ïing bishar HC ka shim rai bad pynmih hukum khlem da ailad ïaki ban jubab ne pynshai hakhmat ka ïing bishar.
