-HT Wells
Ka pyrthei ka shangïong ngaiñ ha ka janmiet Sngipalei, 19.02.2026 haba ka khubor ba sngewsih ka par stet lyngba ki social media bad kiwei pat ki lad pathai khubor ba u Dr RickyA.J. Syngkon, MP Lok Sabha badon burom jong ka Shillong Parliamentary seat, um don shuh. Hadien ba la pynthikna da ki Doctor bad ki Nurse jong ka Dr. H.Gordon Roberts’ HospitalShillong ba ka jingkhlad noh ba kyndit jong I, ka dei na ka daw jong kata ka Cardiac arrest nejingsangeh kynsan u klongsnam jong i ha ka por 8:42 Pm. Dei kham hadien katto katne por, ba ka kham shai ka daw jong ka jingkhlad noh jong I, ha ka por ba I dang ïalehkai Futsal bad ki paralok jong I ha kawei ka madan Futsal ha Mawïong, haba ka i la ïoh ruh ban kren khatduh shwa ka game ban kyntu ïa ki paralok ba ïalehkai lang ba dei ban pynmlien ban khilan met ban ïoh ïa ka jingkoit jingkhiah, namar ka ri kam lah ban riewspah lymda ngi don ha ka met bakoit bakhiah.
U Dr Ricky u dei u briew uba ïohlut ka jingieit jong ki para Khasi Khara jong ngi naduh ba u don kum u Professor Economics ha NEHU bad katno tam hadien ba u la rung sha ka jylli ka saiñ hima sima khamtam kum u nongmaitlynti ban seng ïa ka Voice of the People Party (VPP), da ka jingthmu ban weng ïa ka synshar bymhok bad ïa ka bamsap bamklop. Hadien ba ka VPP ka la jied ïa I kum u kyrtong jong ka election ba 18 jong ka Lok Sabha, ki kyntien, ka jinglongrit, jingsngur bad jingsheptieng Blei, ka dei ka dawbah ba in jop shuh shuh ïa ka dohnud jong ki babun ki paidbah. Hooid, ha ka Election MLA 2023, na Umsning Constituency I la shah rem namar ba ka jingpynbna ban ïa aireng ha ka lympung ka la thmit shaba palat bad bun ki voters ruh kim pat ithuh ïa I, hynrei ha ka Election Lok Sabha pat de ba I la kham ïoh kylluid ka por, ka nam jong I ka la pur stet kum ka ding ha u ‘langïap. Na kawei ka segment sha kawei pat kylleng ka ri Khasi Jaintia, ki lyer election (election aura) jong i ka beh kyrthep kat haduh ba ki nongrep ki mih na lyngkha ryngkat ki sopti shahktieh ban mareh sha surok ban ïa kynjut kti bad i. Ki khynnah sharai masi na lum, tang mar syn ïohi ïa ka dur jong u Dr Ricky, ki pyrta ïa ka shap jong I, “Ha u Prah ! Ha u Prah”
Ka jinglong babha bad ka mynsiem ba tieng burom ïa u Blei ka la pynum lypa ïa ka dohnud jong ki briew, ha man la ki election campaign jong I, phim ju ïohsngew ba in kawang ktieh ne ktah mat-ïong ïano ïano ruh, na kata ka daw ki opponents jong I ruh kim ïohlad ban khyrwit kylla. Haba I ïalap election, I pynkynmaw ba ki paidbah ki dei ban sumar bha ïa ka meimariang kaba u Blei u la ai kyrpang ïa u khun bynriew, namar i ong, lada ngi la pynjot lut, la khura lut ïa ka mariang, kin mih bun ki khñiang jingpang bad kin wan pynshitom ïa u briew ha ki dur bapher bapher bad ynda kam seisoh shuh; kyrduh ka bam ka dih bad ki um ki wah ki kylla bih lut. Ka jinglong ba kyrpang (quality) jong I ka paw ym tang ba u long u politician ba dang spehlung hynrei u dei ruh u nonghikai ha ka skulbah NEHU ba la ihbha, bad u dei ruh u nongïalap ktien Blei bad u nongïasyllok ba jemsur. Kum ka jingpynkynmaw, U Dr Ricky u la jop kput palat 3 lakh 72 hajar (3,71,910) tam ïa u ma Vincent palat u sitting MP ba la 3 samoi kynthih jong ka party Congress.
Kawei na kiba sahkynmaw eh ka jingjia ka long ha ka 20.07.2024 haba u nongthoh u la khot ïa I ban long Chief Guest ban pyllait ïa kawei ka kot, ha Conference Hall ka KJP Synod Sepngi,katba kiba ha ïing bad nongïarap ki dangap dngong ïa u Dr Ricky habar, da ka jingkhmihlynti ba kat u MP Lok Sabha te un wan beit da ka Kali light saw kumba long kiwei pat ryngkat bad kiescorts, phewse, kim tip ei ei kita ki ba ap habar ba u Dr Ricky u la don shapoh jong ka Hall, namar ba kim poi pyrkhat bad ithuh ruh ïa i ba I wan da ka Scooty bad deng helmet, te ka shukylla long noh tang ka jingïarakhie lang hadien kata ka jingjia. Wat ki lad pathai khubor kum ka Doordarshan bad kiwei pat ki lyngngoh ba u MP jong ngi um donkam wat u Personal Security Officer (PSO); haba kylli, u jubab ba ngam don daw ban tieng ïano ïano ruh namar baroh khoit ki dei ki paralok bad ki parakher paramer jong nga, ngam don nongshun, I ong.
Nangta kum u MP, kumto ngi la sakhi kumno u ïasaid hapoh Parliament ïa ki mat ki jura jong ka Jaidbynriew kum ka jingpynrung noh ïa ka Ktien Khasi hapoh ka Eighth Schedule ka Constitution ka ri India, ka Inner Line Permit, ban pynsangeh noh ka tih dewiong ‘liewkhnai (rat hole mining), dangshen ban pynkiar ïa ka alignment jong kata ka super Highway na ki khlaw kyntang sha thain RiBhoi bad kiwei kiwei. Kawei na kiba sahkynmaw ba u kren hapoh parliament ka long ba u sot na ka ktien u Blei (Bible) shaphang u syiem Solomon bad baroh ki sngap jar. Nangta, u lah ban ïoh audience ne ban ïakynduh ïa u Amit Shah, Union Home Minister, Narendra Modi Prime Minister, Finance Minister, Sitharaman, Rajnath Singh Defence Minister ban ïakren ïa ka jingai jaka shna surok na ki jaka sah ki shipai bad kiwei pat. Kham ñiar ban ïoh ïakren kylluid bad kitei ki heh sorkar, katba ma u pat u biang beit. Ka ktien u Blei ka ong “kumne yn kyntiew ïa u briew uba sheptieng ïa u Trai”. Katba lah la ka bor, u la pyrshang ban sam grant ne MP Scheme sha ki skul, ki college, ki shnong ki thaw bad kaba myllung mynsiem eh ba u ai scheme kyrpang ïa ki nongpang Cancer kiba shah sumar kylleng kylleng.
Hynrei, ha ka por ba ka Ri bad ka Jaidbynriew ka dang khmied bha ïa ki khmat sha ka longrynïeng jong utei u Nongïalam, kynsan kynsan ka jia ka khubor ba sngewsih ba u ïoh cardiac arrest bad kyllon ha madan katba u dang ïalehkai Futsal. Ka jingduh ka dei kaba khraw namar ba arsnem ruh ym pat dap bha ba u trai kum u MP, hynrei ka jingïap ka la wan ban shaw noh ïa ka mynsiem jong u. Ha ka jingshisha, sa laitylli ki snem, dangkhmihlynti ban shakri bha, pynban la dkhut noh tbak syndon. U la lip kynsan kum u khlur ba thaba ha sahitbneng, ka bneng ka dum ngaiñ bad ka jaidbynriew ka sah ha ka lyngngoh ha ka umdum.U la iehnoh shadien ïa ki dienjat ha u Shyiap jong ka por pynban ka jingkynmaw kan ïaisah khana baroh shirta. Ka jingkren jong ki riewstad ka ong, ‘ba ïa ka ryta jong u briew ym shym la ñiew da ki snem hynrei da ki kam ba u la leh”. Ka jingjop jong u ka phalang ïa ka jingïalong kawei ka Jaidbynriew da ka jingtehsong ïa ka, kumba la kdew haneng, naduh ki khyllung, ki khynnah, samla, rangbah bad tymmen ki ieit lut ïa une u MP jong ngi. Na ka liang jong u nongthoh, u phah ïa ka khubor sngewlem sha baroh kiba haïing hasem ba u Blei un sopspaiñ ïa ka dohnud bapdang ha kum kane ka por ba u Lyoh dum u wan ban tyllup ïa ki. Satang ha Jingkynmaw, Dr Ricky A.J. Syngkon, to jahthait noh ha ka Jingsuk phi la ai ïa kaba bha tam sha ka Jaidbynriew, wat ha ka por ba lyngkot tam, ka long kaba eh bha ban pynjah ïa ki sohkhliang ka dohnud halor kane ka jingduh noh, hynrei ngi kyrmen ba ka por kan pynkhiah ïa ki Jingmong u briew.