Jowai, Rymphang 20: Ka United Hynñiewtrep Movement (UHM) West Jaiñtia Hills District ha kane ka 19 tarik kila leit buh da ka jingthoh haka ophis u Deputy Commissioner ka WJHD halor ka jingkhaïi beaiñ ïa ki masi bad ki muid kiba wan na Assam ba ïaid lyngba ka Muktor, Barato, Raliang, Phramer, Khanduli, Namdong bad Nartiang sha ka ri Bangladesh.
Halor kane ka seng ka dap ka jingsnewkhia namar ka jingïohlad palat ki nongkhaïi ban leh ïakane ka kam be-aiñ khlem kino kino ki kot ban pynshisha, ka seng haba wad jingtip ïa kane kala ïoh jubab na ka tnad Veterinary ba kim shem la don ïa kita ki check point hapoh ka District.
Na ka liang u President ka seng ma Pynjurbha Suchiang ula ong kum ka seng kala dep ban ujor ïa kane ka jingïohlad ki briew ban salan beaiñ ïa ki masi sha Bangladesh, hynrei haduh mynta kane ka kam ka dang ïaibteng bad kane kala wanrah pynban ïa ka jingkiew dor jong ka doh masi bad ka jingduna doh hapoh ka jylla.
Shuh shuh u ong ka seng kala pynrem jur ïa kane bad la dawa jur ïa ka sorkar lyngba ka ophis u DC ba kan khang noh shi syndon ïa kane ka kam beaiñ, kum ka seng kala kren shai lada ki bor sorkar kim lah ban khang lad ïa kane ka kam na ka liang ka seng kam banse ban leh ïa kaba donkam.
