Shillong, Rymphang 20: U Lamphang ka ïingdorbar thaw aiñ ka jylla u Thomas A. Sangma u la pynbna hapoh ïingdorbar ba ha ka jingïalang ka Business Advisory Committee ki la shim ïa ka rai ban pynsangeh ïa baroh ki kam ka ïing Dorbar ban pynpaw ïa ka jingsngewlem halor ka jingkhlad u MP u Dr. Ricky A J Syngkon u la ong ba kane ka jingïashong dorbar kan long beit thik na ka bynta ban pynpaw ïa ka jingsngewlem ïa u MP ba la khlad noh.
Ïa ka jingkren sngewlem la sdang da u nongïalam ka ïingdorbar thaw aiñ ka jylla u Myntri Rangbah u Conrad K. Sangma, ha ka jingkren ka jong u, u la ïathuh ba dang ha kine ki 15 sngi ba ladep u Dr. Ricky u la wan ïakynduh ïa u ha ïingsah ha Nongbah Delhi ha kaba ki la ïakren na ka bynta ki kam jong ka jylla ba kumno ban pyntyllun shakhmat ïa ki kam.
U Myntri Rangbah u pynpaw ia ka jingsngewsih kaba khraw halor kane ka jingkhlad syndet jong u Dr. Ricky ka long ka jingduh kaba khraw ym tang ïa ka 1-Shillong (ST) Parliamentary Constituency hynrei ka jingduh ka long ia ka jylla hi baroh kawei.
U Nongïalam ka liang pyrshah u Dr. Mukul Sangma ha ka jingkren jong u, u la pynpaw ïa ka jingsngewsih haba ïadei bad kane ka jingjia ka bym poi pyrkhat kane ka long ka jingduh ïa ka jylla baroh kawei.
Kiwei ki dkhot ka ïingdorbar kiba la ïa shim bynta ha ka jingkren sngewlem ki long u Bah Charles Pyngrope, u Bah Mayralborne Syiem, u Bah Ronnie V. Lyngdoh, u Bah Charles Marngar, u Bah Adelbert Nongrum bad kiwei kiwei.
Kum ka dak jong ka jingsngewlem na ka bynta ka jingkhlad noh u MP Dr. Ricky A J Syngkon ka Ïing Dorbar ka la pynlong ïa ka jingsngap jar kaba ar minit ha ka sngi thohdieng.
