Phah khubor sngewlem ka Congress bad BJP halor ka jingkhlad u Dr Ricky uba dei u MP

Shillong, Rymphang 20: Ki ar tylli ki seng saiñ pyrthei kata ka Meghalaya Pradesh Congress Committee (MPCC) bad ka Bharatiya Janata Party (BJP) Meghalaya State unit kila pynpaw ïa ka jingsngewsih kaba jur halor ka jingkhlad kyndit jong u MP ka Shillong Parliamentary Seat u Dr Ricky AJ Syngkon.
Kum ka dak jong ka jingsngewlem,u President ka MPCC u Vincent H Pala ryngkat bad u MP na Tura u Saleng A Sangma ki la leit sha ka ïingkmie u (L) Dr Ricky Syngkon ha Pohkseh ban pynpaw ka jingsngew bad ban don ryngkat bad ki ha kane ka khyllipmat jong ka jingsngewsih.
U Bah Vincent H Pala, u la pynpaw ïa ka jingsngewsih, da kaba ong, “Ka jingaiti lut jong u ha ka jingshakri ïa ki paidbah, ka jinglong ba jemnud bad ba jai jai jong u, bad ka jingsngewkhia ka jong u na ka bynta ki paidbah kan ïai sah jingkynmaw.”
Ha kane ka jingleit jngoh, ki nongïalam ki la pynlong ka jingduwai na ka bynta ka mynsiem kaba la khlad noh bad ki la pynpaw ruh ïa ka jingsngewlem sha kiba haïing hasem.
Na ka liang u State President jong ka BJP u Rikkam G Momin u la pynpaw, “Ngi sngew kyndit bad sngewsih jur halor ka jingkhlad kyndit jong u Dr Ricky AJ Syngkon Member of Parliament na Shillong”.
“Ngi kynmaw ieid ïa u Dr Ricky kum uwei na ki riewstad ba paw jong ka Jylla jong ngi, kum u briew uba ju dap da ka jingphuh samrkhie uba ka jingsngewtynnat jong u ka ktah ïa baroh” ula ong.
U Dr Ricky u dei uba ngeit ïa U Blei bad u la trei shitom na ka bynta ka jingmyntoi jong ki trai ri trai muluk jong ka Meghalaya.
“Ka jingkhlad noh jong u ka la iehnoh ïa ka jingthylli ha ka saiñpyrthei jong ka Jylla kaba kan long kaba eh ban pyndap” ula ong haba bynrap ban duwai ba ka mynsiem jong u Dr Ricky kan shongthait ha ka jingsuk.