U Dr.Ricky AJ Syngkon u briew uba aiti lut bad u riewsaiñ pyrthei uba sngewrit : Adelbert

Shillong, Rymphang 20 : U MLA ka VPP na North Shillong Bah Adelbert Nongrum, ula ai burom khatduh ïa u MP ka Shillong Dr Ricky AJ Syngkon, uba la khlad kyndit kyndit ha ka miet sngi Palei ha Robert Hospital, Jaiaw.
Haba ai jingkren sngewlem ha ïing Dorbar Thaw Aiñ ha ka sngi Thohdieng, u Bah Adelbert ula ong “U Dr Syngkon u dei u briew uba aiti lut bad uba don ka jinglong ba lah ban khring ïa kiwei bad u riew saiñ pyrthei ba sngewrit. Ka jingkhlad noh jong u ka dei ka jingduh kaba khraw ym tang ïa ka ïing hynrei ïa ka Party bad ka Jylla hi baroh kawei” ong u Bah Adelbert.
Une u MLA ka VPP ula ai khublei ïa ka Sorkar namar ka jingpyni ïa ka jingïadon ryngkat bad ong “Nga ai khublei ïa ka Sorkar lyngba u Myntri Rangbah, Symbud Myntri Rangbah bad ki bor Sorkar kiba la leit sha Robert Hospital ban pyni ïa ka jingïadon ryngkat ha ka por ba sngewsih”.
Ula pynpaw ïïa ka jingkyrmen ba ka jingkhlad u Dr Syngkon kan wanrah ïa ka jingkylla ha ka rukom pyrkhat pyrdaiñ ha ka saiñ pyrthei. “Nga ngeit skhem ba ka jingkhlad jong u kan wanrah ïa ka jingkylla ha ka rukom pyrkhat pyrdaiñ ha ka saiñ pyrthei khnang ba ngin lah pynthikna ïa ka jingkylla ba shisha ha ka Jylla baieid jong ngi”.
Katba u President ka VPP bad MLA ka Nongkrem Bah Ardent M Basaiawmoit bad ki arngut kiwei pat ki MLA ka party-Bah Brightstarwell Marbaniang bad Bah Heavingstone Kharpran ki khlem poi satia sha ka ïing Dorbar. Hadien, u Bah Ardent, uba la bunkam ha ka jingpynkhreh ïa ka sngi ontep, ula pynshai ba u dang mut ba la pynkynriah ïa ka Dorbar haba shim ïa ka rai jong ka Sorkar hynnin ka sngi.
U Bah Adelbert ula phah ïa ka khubor sngewlem sha ki bahaïing hasem bad ong “Ai ba u Blei ba donbor tam ba un kyrkhu ïa ka mynsiem bad duwai ba u Blei un pdiang ïa ka mynsiem ba la khlad noh ha Bneng”.