Shillong, Rymphang 20: U Myntri Rangbah ka jylla u Conrad K. Sangma haba kren sngewlem hapoh ka Ïingdorbar halor ka jingkhlad syndet u MP ka 1- Shillong (ST) Parliament Constituency u Dr. Ricky A J Syngkon ka sorkar ka la shim ïa ka rai ba ka sngi Saitjaiñ kan dei ka sngi shuti ha lum Khasi bad Jaiñtia kum ka jingburom ïa u MP.
U Myntri Rangbah u la ong ba ha ka sngi Saitjaiñ kaba ki ophis sorkar ki hap ban plie kum ka jingburia ïa ki sngi trei ba la ai shuti hynrei ban ailad ïa ki paidbah ba kin leit ban ïa shim bynta ha ka jingpyndonburom khatduh ïa u MP kumta ka sorkar ka la shim ïa ka rai ba ha ka sngi Saitjaiñ kan dei noh ka sngi shuti.
U Myntri Rangbah u la ong ba ka dei ka jingduh kaba khraw ïa ka jylla na kane ka jingkhlad kyndit u Dr. Ricky u MP ym tang ïa ka 1- Shillong (ST) Parliament Constituency hynrei u dei ruh u MP jong ka jylla baroh kawei kumta u phah ïa ka khubor sngewlem sha ki bahaïing ha sem halor kane ka jingduh bad ai u Nongbuh Nongthaw un pyntngen ïa ka ïing ka sem hi baroh kawei bad kyrpang eh un ïoh ïa ka jingjahthait bymjukut ha bneng.
