U Dr. Ricky u dei uba ju ïakren bha bad baroh ki nongïalam seng saiñ pyrthei, ong u Conrad

Shillong, Rymphang 20: U Myntri Rangbah ka jylla u Conrad K.Sangma, u nongïalam ka liang pyrshah u Dr. Mukul Sangma, ki MLA ki MDC kumjuh ki riew paidbah ki la ïaleit sha ïingkmie jong u MP bam kwai ha dwar u Blei u Dr. Ricky A J Syngkon ha Pohkseh ban leit sngewlem ha kane ka jingjia ba sngewsih.
U Myntri Rangbah ka jylla u Conrad u la ïathuh ba u Dr. Ricky u dei u nongïalam u ba ïa kren ïa khana bad baroh ki nongïalam saiñ pyrthei bad u long u briew u ba baroh ki pdiang ka jingkhraw ka jong u nalor ka jingstad, ka jingshemphang kaba pynkhraw ïa u, u don ïa ka mynsiem sngewrit bad ka jinglong kaba shisur.
La ïathuh ba u la ïakren bun bunsien haba ïakynduh bad u bad man ka por ba ki ïa kren ïa khana ka paw shynna ka jinglong luilui bad ka jingkut jingmut ban trei na ka bynta ki paidbah bad ka jylla.
U Nongïalam ka liang pyrshah u Dr. Mukul Sangma u la ong ba bunsien ki briew ki kiar ban ïa tynrong ïa kane ka kam ha ka saiñ pyrthei, hynrei bunsien ka ju long ba lada ki kmie ki kpa ki dei kiba ïa kit ïa bah ha ka saiñ pyrthei ki khun ruh ki ïa bud lem ïa kata ka lynti bad kane ka long ka nuksa ïa ki samla ba kin wan shakhmat ban ïa shim bynta ha ka saiñ pyrthei.
Ïa ka met jong u Dr. Ricky la pynkit mynta ka sngi sha ïing jong u ha Nongsder ha kaba bun spah ngut ki la leit synran lang bad ka jinglehburom khatduh kan long ha ka 21, tarik u Rymphang, 2026.