Khot sngewbha ka Balang Presbyterian Mynso sha ka Jingïaseng Samla KJP Synod Mihngi kaba XXIV

Jowai, Rymphang 20: Ka Jingïaseng Samla KJP Synod Mihngi kaba Arphewsaw (XXIV) kan long ha ka Balang Presbyterian Mynso, Mynso Presbytery ha ki tarik 27th Feb haduh 1st March 2026. Ka Balang Presbyterian Mynso ka khot sngewbha ïabaroh ki parabangeit kiba hapoh u pud ka KJP Synod Mihngi bad kiwei kiwei ruh kiba lah ban wan sha katei ka jingïaseng ha ka Sngi u Blei jong ka 1.03.2026.
Ka shnong Mynso ka jngai tang kumba 24 Kms na Jowai bad 12 Kms na ka Lad Pasyih. Lah ban poi sha ka shnong Mynso na ki saw tylli ki surok, kita ki long- Pasyih-Mynso Road, Lad Mukhla-Nangbah-Kyndongtuber Road, Shangpung- Pammanik Road, bad Samatan-Mynso Road.
Kitei ki surok baroh saw tylli ki long kiba ladep pynbha, na ka bynta ka jingïaidbeit jong ka jingwan sha katei Jingïaseng Synod, ka Balang kala kyrpad ïa ki nongwan jingïaseng baroh ban kohnguh bad ban bud ïa ki jingpynbeit jong ka kiba long kumne harum:
Naduh ka por 7 AM haduh 5 PM haka Sngi u Blei (Sunday) nym shah shuh ïa kino kino ki kali na Mynso bad KyndongTuber ban kiew sha Phra-mer/Jowai. Ban lait na kino kino ki jingeh la kyrpad ïa ki nongwan jingïaseng ban ym ïa overtake khamtam naduh Pasyih haduh Mynso.
Ka Balang ka nym shah ïa kino kino ki nongdie jingdie ban shongdie ha katei ka sngi. Ki parangeit kiba wan na ki thaiñ Shillong, Ummulong, Wahiajer bad Nartiang ki lah ban ïaid na u Surok Lad Mukhla-Nangbah-KyndongTuber; kiba na ka Presbytery Mowkaiaw bad Shangpung kin ïaid na u surok Shangpung-Pammanik, kiba na ki thaiñ Tadbamon, Barato bad Lapangap ki ïaid na u surok Samatan-Mynso bad kiba na ka Presbytery Jowai, War Jaiñtia, Rymbai, Sutnga bad kiwei kiwei kin ïaid na u surok Pasyih-Mynso.
Ki jaka sangeh kali baroh ki long ha sawdong jong ka jaka long Jingïaseng kumta ka Balang kam shym la pynkhreh Car Pass shuh. Ki parabangeit jong ka Balang Mynso ki khot bad pdiang sngewbha ïa ki nongwan Jingïaseng baroh sha ki ïing ki sem jong ki. Kane ka long katkum ka jingpyllait khubor na u TBn.E.A. Sungoh uba dei u Secretary ka Balang Presbyterian Mynso.