Ai ba ka Politik kan ym dei ka rynsan jingpynïashun hynrei ka jingai jingmut bad jingshakri : Dr Ampareen

Shillong, Rymphang 20 : Ka Chief Adviser ka Sorkar MDA bad MLA ka NPP na East Shillong Dr Ampareen Lyngdoh ka la pynpaw ïa ka jingsngewsih halor ka jingkhlad kyndit u MP ka Shillong Dr Ricky AJ Syngkon, haba kyntu ïa ki riew saiñ pyrthei ba kin bud ïa ka nuksa jong u.
“Lada dei ïa ngi ban burom ha ka jingkynmaw ïa u, ai ba ka saiñ pyrthei kan ym long ka rynsan ka jingpynïashun hynrei jong ka jingïa ai jingmut bad ka jingshakri. Ki jingïapher kin don beit, hynrei ym ban taplup ïa ki jingkitkhlieh ba ngi ïa don baroh” ong ka Dr Ampareen haba ïashimbynta ha ka jingïakren ai burom khatduh ïa une u Nongïalam ba khlad noh.
“Ngi ïeng mynta ban kynmaw burom ïa u (L) Dr Ricky. Ka jingkhlad ba khlem pat dei por jong u, ka la wanrah ïa ka jing sngewsih ym tang ïa kane ka ïing Dorbar hynrei ïa ki paidbah ka Jylla, kiba ngi baroh ngi shakri”.
Ka kong Ampareen ka la pynpaw ruh ïa ka jingaiti lut jong u Dr Syngkon ha ka jingshakri bad ong ‘Watla u Dr Syngkon bad ma nga, ngi dei na ki liang ba ïapher, ka khyllipmat kum kane ka pynkynmaw ïa ngi ba shabar ki jingïasngewpher jong ngi, ngi don pat ïa kajuh ka jingthmu, ha u 2024, u Dr Ricky bad ma nga ngi la ïeng mar pyrshah, ngi la ïatai bad ngi la pan ïa ka jingshaniah jong ki juh ki briew. Watla katta, nga ju kynmaw beit, wat hapdeng ka jingshit ka jingïalap elekshon, ym ju kynthoh shimet haba ai jingkren”.