Ai burom u Lamphang da kaba pule ïa ka histori jongka jingim u MP ka Shillong hapoh ïing Dorbar

Shillong, Rymphang 20: U Lamphang ka ïing Dorbar Thawaiñ ka jylla u Thomas A Sangma u la ai burom halor ka jingkhlad noh u MP ka Shillong Dr Ricky AJ Syngkon, da kaba pule ïa ka histori halor ka jingim jongu ha ka por ba pynlong ïa ka jingkren sngewlem hapoh ka ïing Dorbar mynta ka Sngi Thohdieng.
Ha kane ka sngi, la pynsangeh lut ïa ki kam ki jam jong ka Dorbar bad la pynlong thik ïa ka jingpynpaw ïa ka jingsngewlem halor ka jingkhlad jong u MP ka Lok Sabha.
U Dr Syngkon, ula khlad noh ha ka rta kaba 55 snem ha ka 19 tarik u Rymphang bad la kha ïa u ha ka 6 tarik u Kyllalyngkot 1972 ha Laitumkhrah, Shillong bad u long u nonghikai bad u riewsaiñ pyrthei uba la aiti bha ha ka kam shakri ka jongu.
Ula leit skul ha St Edmund’s School bad ula pyndep ïa ka jingpule skul na ka Laitumkhrah Presbyterian School bad hadien kane ula leit pule ïa ka Commerce ha Shillong Commerce College.
Ula pyndep bad ïoh ïa ka kyrdan Master ha ka Economics bad ïa ka kyrdan Doctorate ha ka Economics na ka skulbah North Eastern Hill University.
U Dr Syngkon ula rung ha ka kam saiñ pyrthei ha u snem 2023 bad ula ïakhun ïa ka elekshon MLA na Umsning constituency kum u kyrtong ka Voice of the People Party (VPP). Hadien kane ula ïakhun ïa ka elekshon MP Lok Sabha 2024 na Shillong Parliamentary Constituency na ka VPP ha kaba ula jop don burom bad ïoh long kum u MP sha ka Lok Sabha kaba 18 jong ka ri.
“Udei u dkhot uba la seng ïa ka Voice of the People Party (VPP) bad shakri kum u General Secretary,” la ong u Lamphang.
“Kum u dkhot jongka Parliament, la bna ïa ka nam jongu Dr Syngkon kum uba hok bad shida, ka jingstad bad jingshemphang kaba bniah bad uba ïeng na ka bynta ka thaiñ shatei lam mihngi halor ka hok bad halor ki kam pynroi”.
“Watla udei uba la ngam jylliew bha ha ka jingngeit, ula pyni pat ïa ka jingsngewrit, jingnsgewsynei bad ai ruh ïa ka jingshakri ïa ki paidbah bad ha ka jingim kaba shimet ka jongu” la ong u Lamphang bad ka bynrap “Watla ngam shym la ïoh than ïa ka lad ban ithuh shimet bha ïa u, hynrei nga la ïoh jingtip ba nalor ka jinglong kum u nonghikai uba tbit bad u riew sain pyrthei uba tbit, u long ruh u briew uba sheptieng ïa u Blei, u rangbah uba khlain bha ka jingngeit. Ha u snem ba la dep ha ka bnai Nohprah 2025 ula ai jingkren bad ïalap shaphang u Blei ïa ki hynmen bad para kynthei bad shynrang Garo ha Delhi ha ka jingrakhe lypa ïa ka jingïalehkmen ïa ka Christmas jongka Delhi Achik Christians Fellowship.”
U Sangma ula pynpaw ïa ka jingsngewlem da kaba ong, “Nga ïasnohkti lang bad ka ïing dorbar ban ai burom bad buh ha ki jingduwai ha u Blei jong ngi ba un ai ïa ka bor bad ka jingshlur ïa ki bahaïing bahasem, kiba ïaieid ïajan bad ïa ki nongkyrshan halor kane ka jingduh kaba khraw”.