Nongstoiñ, Rymphang 19 : Ki dawai kynbat ki dei ki jait dawai kiba ka jaitbynriew Khasi naduh hyndai kulong bad ka dang ïai bteng haduh kine ki sngi. Ym lah ban len ïa ka jingshisha ba kumba 70% na ki paidbah nongshong shnong hapoh ka jylla, ki dang shaniah ïa ka jingkoit jingkhiah jong ki ha ki dawai kynbat khamtam ki paidbah kiba im ha ki nongkyndong.
Ka jingshaniah jong ki paidbah nongkyndong ha ki dawai nongai dawai kynbat lane ki kobiraij ka dei namar ka jingban jong ka jingduk. Nalor ka jingjngai jong ki jaka sumar kiba la kham biang ka ktah ïa ka lut ka sep ka spah ka phew, namar haba leit ha ki Hospital kiba heh, ka jinglut ka long kaba jur bha khamtam eh lada ki dei ki jingshitom kiba la kham jur.
La lap ruh ba wat la ki don ki jaka sumar ba la buh da ka sorkar ha ki bun ki jaka ha ki nongkyndong, hynrei kitei ki jaka sumar kim pat biang satia la ka long ha ka liang ki Doktor, ki Nurse, ki dawai dashin bad ka rukom sumar.
Haba phai pat ha ka jingkynrei ki jait jingpang kiba ki nongpang ki donkam ban shah ai snam, ka long kaba eh haduh kattta katta, namar dei tang ha sor Shillong ba ki jaka sumar ki la don ïa ki jaka pynlang snam kiba kham biang na ka bynta ban ai ha ki nongpang kiba donkam.
Haba phai pat ha kawei ka liang ka jingshaniah jong ki nongkyndong ha ki dawai kynbat ka dei ka jingngeit ïa ka jinghikai jong ki longshuwa. Ym lah ban len ba ka Ri lum Khasi Jaiñtia, ka dei kaba bun tam ki nongai dawai kynbat bad ki nongkhem briew ba kynthup ïa ki shynrang bad kynthei.
Ha ki snem ba la dep ka jingdon ki nongai dawai kynbat hangne ha Ri Khasi ka la wanrah ruh ïa ka nam kaba khraw. Kumban pynkynmaw ba u President ba don burom ka ri u (L) Abdul Kalam, u don ka jingieit ba kyrpang ïa ka jylla Meghalaya, kat haduh ba u la wan ban ïuhkjat bad ban peit ïa ka jingstad kaba kyrpang jong ki briew ha kane ka jylla ban ai jingsumar da ki dawai kynbat.
Hynrei kaba sniew bok ka long ba utei u nongsynshar ba ha khlieh duh ka ri, um shym pat la lah ban pyndep ?a ki jingthmu ba donkam ban leh ei ei na ka bynta kane ka jylla hynrei u la khlad noh kynsan khlem poi pyrkhat.
Kumta, na ka bynta ban wanrah ïa ka jingmyntoi ha ka jingkoit jingkhiah na ka bynta ki paitbah, ka sorkar ka la dei ban nang kham pynshlur shuh shuh ïa ki nongai dawai kynbat ha ka jylla, da kaba thaw ki lad ki lynti ban ai jingïarap ha kiba bun ki liang, khnang ba kan kham pynsuk ruh ïa ki ba pang ba shitom na ka jingpynlut ksan ha kiba bun rukom.
