Sngewlem ba khlad kyndit ka kong Tiewmihpli Lyngdoh ka dkhot jong ka Sengkhihlang

Jowai, Naitung 12: Ka Sengkhihlang ka pynpaw ka jingsngewsih kaba khraw bha halor ka jingkhlad kyndit jong ka kong Tiewmihpli Lyngdoh na ka Sein Raij Tuber, ka kong Tiewmihpli kadei ka dkhot jong ka Sengkhihlang bad ka long ruh ka longkmie kaba trei shongshit bha ïa ki kam Seng ba kumno ban kynrong kyntiew ïa ka jingngeit ha ka Niam tynrai (Khasi) hapoh ka bri u hynñiew trep hynñiew skum.
Kane ka jingkhlad kyndit jong ka, ka wan rah ka jingduh nong kaba khraw bha ïa ka Sengkhihlang bad kumjuh ïa ka bri u hynñiew Trep hynñiew Skum hi baroh kawei, kane ka longkmie kadei kaba shimkhia bha bad kaba pyndep hok ïa ki kamram jong ka, kiba ka Sengkhihlang ka bynshet ha ka khamtam ha ki Lympung heh jong ka Sengkhihlang lada dei sha ki thaiñ Ri Pnar, Ri War, Ri Bhoi ne Ri Khasi kane ka longkmie kam ju kynran dien satia ban trei ïa ki kam kiba la bynshet ha ka.
Kumta ngi na liang jong ka Sengkhihlang ngi phah ïa kane ka khubor sngewlem sha kiba ha ïing ha sem jong ka bad kumjuh ruh ïa ka Seiñ Raij Tuber kaba long ka Seiñ Raij jong ka bad to ai ba u Blei Trai Kynrad u nongbuh u nongthaw un dang pyntngen bad theh shuh shuh ïa ki jingkyrkhu kyrdoh ïa kiba ha ïing ha sem jong ka, ïa ka Kmie u Kpa u Lok jong ka ki hymmen ki para bad khamtam ïa ki khun jong ka Arngut iwei i kynthei bad iwei i Shynrang kiba ka la ieh shadien.
Na ka liang jong ka Sengkhihlang ka buh ka jingduwai ban kyrpad ha u Blei Trai kynrad ba ai ba kan poi suk poi sain sha Dwar u Blei bad ka ruh kan ksan ñia ksan shang ïa kiba ha ïing ha sem jong ka bad kumjuh ruh ïa ka Sengkhihlang bad ka Sengkhihlang kan ïa don lang bad kiba ha ïing ha sem jong ka lada ha kano kano ka por ba donkam ïaka Sengkhihlang. Kane ka long katkum ka jing pyllait khubor u Rgh, S. Sari Publicity Secretary ka Sengkhihlang.