Shillong, Naitung, 11: Ka Dorbar Shnong Laitkor Rngi ka la pynmih da ka jingmaham kaba tyngeh ia kino kino ki briew kiba sah hapoh ka shnong ne wat ia kiba nabar shnong ban die ia ki tiar ki tar kiba long beaiñ kum ki jingdih pynbuaid kum u drok, ki tiar tuh bad kiwei kiwei.
Ka kyrwoh lyngba u Rangbah Shnong, u Bah Kitbor Kharkongor ka la maham ruh ia kiba nabar shnong ban wanrah kum ia kine ki jait tiar lane ban pyndonkam ia ki hapoh u pud u sam jong ka shnong.
U la ong ba ka Dorbar Shnong kan ym ailad ia kino kino ki kam kiba long pyrshah ia ka imlang bad maham tyngeh ba lada lap kino kino kiba ialeh pyrshah ka Shnogn kan aiti sha ki bor jong ka aiñ. Kane ka jingmaham ka la long hadien ba ki Pulit ki la ioh kem ia uwei u samla na kane ka shnong halor ka jingdonkti ban pynpoi ia u drok sha Tura katkum ka khubor ba la ioh na ki Pulit.
