Jowai, Rymphang 18: Ka Indian National Congress lyngba ka prokram Sangathan Srijan Abhiyan kaba la sdang hadien ka AICC Session ha Ahmedabad, kala buh thong hakhmat eh ban pynkhlaiñ bad ban thaw thymmai ïa ki ‘District Congress Committee’ haka rukom treikam jong ki da kaba pynïajan bad ki paidbah nongshong shnong.
Kumta na ka liang ka Lhingkim Haokip kaba dei ka AICC Observers, mynta ka sngi 19 tarik u Rymphang 2026 kala wan ban pyllait ïa ki Form na ka bynta ka kam President jong ki District Congress Committee, haka jingïalang bala pynlong ha ophis treikam ka West Jaiñtia Hills DCC ha Jowai, ha ryngkat ka jingdonlang ka Joplyn Scot Shylla, President Mahila MPCC, u ma Emlang Laloo, Nartiang BCC President, ma E.G War, General Secretary WJHDCC bad kiwei de ki nongkitkam ka District.
La ïathuh daka Lingkim Haokip ka jingthmu jong kane ka Sangathan Srijan Abhiyan ka long ban jied thymmai ïa ki DCC President, da kaba kin pyndap shwa ïa kane ka Form bad pynpoi beit sha ka AICC ba kan ïoh jied ïa u ne ka President kiba don shisha ka mynsiem ban ïatreilang bad ki nongkitkam jong ka seng baroh.
Kino kino kiba kwah ban shim ïa kane ka kam President ki lah ban pyndap ïa kane ka Form bad la ailad ïa baroh ban trei ïa kane ka kam naduh ki SC, ST, OBC, ki Minority, ki longkmie bad kyrpang eh ïa ki khun samla. La kyntu ruh ïa ki nongkitkam ka Party ba kin trei shitom ban sei pyrthei ïa ki nongïalam ba shisha kiba don ka jingkitkhleih ban pynkiew ïa ka Party Congress.
Lyngba kane ka rukom treikam jong ka Sangathan Srijan Abhiyan yn pynkhlaiñ shwa na ki District nangta buh sa ki Block, ki Mandal bad haduh ki Committee jong ki shnong ki thaw, la ong ka Lhingkim Haokip.
