Shillong, Rymphang 19 : Ka Hynniewtrep Youth Council (HYC) ha ka sngi Palei, ka la pynpaw ïa ka jingbym sngewtynnad bad bym sngewhun ïa ka kaiphod jong ka Expert Committee halor ka State Reservation Policy ba la wanrah ha ka ïing Dorbar da kaba ong ba ka kaiphod kam shym la lah ban weng ïa ki jingeh jong ka jaidbynriew Khasi.
“Ka jingai jingmut jong ka Expert Committee ban pynneh ïa ka State Reservation Policy 1972 ka long kaba pynduh jingkyrmen. Ngi la khmih lynti ïa ka jingai jingmut kaba kham bha haba pyrkhat ïa ka jingbun paid bad ki jingai jingmut jong ngi” ong u President ka HYC u Bah Roy Kupar Synrem.
U President ka HYC u la ong ba ki jaidbynriew Khasi-Jaintia kiba don haduh 16-17 lak ki dei ban ïoh ïa ka reservation percentage kaba kham heh haba ïa nujor bad ki jaidbynriew Garo kaba don 11-12 lak.
“Ngi long kiba kloi ban pdiang ïa ka jingkynthup lang hajuh ïa ka bhah ba 90% na ka bynta ki Khasi-Jaiñtia bad Garo, bad 10% yn ai sha kiwei pat ki ST bad reserved category,” u la bynrap.
U Bah Roy u la buh jingkylli ïa ki jingai jingmut ba long mar pyrshah jong ka Committee kynthup ïa ka jingpynneh ïa ka Policy jong ka snem 1972 haba ai jingmut pat ïa ka jingpynkylla kum ka carry-forward system bad ka creamy layer concept.
“Kine ki jingai jingmut kin don ïa ka jingktah kaba jur ïa ka lawei ka Jaidbynriew jong ngi ha ka lad ïoh kam ïohjam” u la ong.
