Shillong Rymphang 19 : U MLA ka NPP na Umsning Constituency u Dr Celestine Lyngdoh, ula ïaroh ïa ka sorkar Meghalaya kaba la shimkhia ban kyntiew ïa ka roi ka par bad pynpaw ba ka la don ka jingkiew jong ka ïoh ka kot ka jylla bad ka jingbit jingbiang ha ki liang bapher bapher.
“Ka Meghalaya ka la wan ba ar hadien jong ka Tamil Nadu ha kaba ïadei bad ki kam pynroi ne Development Index bad ka jingroi ha ka ïoh ka kot, ngi long kawei na ki jylla kaba la sted ha ka ban kiew ka roi hapoh ka ri India” ong u Dr Lyngdoh haba ïashim bynta ha ka jingïatai halor ka Governor’s Address hapoh ka ïing Dorbar Thawaiñ ha ka sngi Balang.
Ula pynpaw ïa ka jingroi jongka ïoh ka kot jong ka jylla da kaba ong ba ka ïoh ka kot kala kiew ar shah na ka 29,508 Klur tyngka ha u snem 2018 sha ka 59,626 Klur tyngka ha u 2025.U Dr Lyngdoh ula kdew ruh ïa ki jingbei pisa ka sorkar ha ki bynta bapher bapher ha kaba ka la don ka jingkiew kynthup ïa ka pule puthi, ki surok, ka bording bad ki jingtei ha ki jaka sor.
“Ka sorkar ka la ïaid shisha shakhmat ha ka ban wanrah ïa ki jingkylla ha ka jingim jong ki paidbah. Ha u snem 2023, nga la kob ïa ka sorkar ban pynbiang ïa ka Artificial Turf ha ka madan ïalehkai Football ha Nongpoh bad happoh jong ka 3 bnai la buh ïa u mawnongrim” ong u Bah Lyngdoh.Ula banjur ba ka jingpynleit jingmut ka sorkar ha ki kam pynroi kala wanrah ia ka jingbit jingbiang ha ki thain nongkyndong, kynthup ia ka jingshna ia ki surok, ka jingkiew jong ka jingdon ki Self-Help Group bad ki Producer Group.“Ka jingdon ki Self-Help Group ka la kiew na ka 5,800 ha u snem 2018 sha ka 51,674 ha u 2025,” la ong u Bah Lyngdoh.
U Dr Lyngdoh ula ïaroh ruh ïa ka jingshimkhia u Myntri Rangbah da kaba ong, ba u dei u nongïalam uba kloi ban ïaid ryngkat bad ka jingtrei ïa ka kam bad ula shimkhia ïa ki mat kiba la mad jingeh da ki paitbah jong ka Umsning. “La pyndep ïa ka jingbuh ïa ki Street Light ha Umsning bad ka jingmad jingeh na ka jingkyrduh um ruh la lah ban pynbeit ha ki katto katne” ula ong.
Ula ai jingmut ïa ka sorkar ba ka dei ban leh da kaba tyngeh ïa kito kiba trei torti ïa ki kam bad ong, ba kane ka pynjot noh ïa ka jingkmen jong ka jingïoh ïa ka surok kaba thymmai”.
Ula ai jingmut ba ka sorkar kadei ban buh rekod ïa kum kitei ki kontraktor bad ban pyntip sha ka Sorkar Pdeng ba kan kiar ïa ki ha ka ban ïoh bun ïa ki kam ki jam.
