Halor u Syiem Khynnah ka Hima Sohra, ïakhluid u EM bad u nongïalam ka liang pyrshah

Shillong, Rymphang 18: U Bah Titos W Chyne uba dei nongialam ka liang pyrshah ha ryngkat bad u Executive Member uba peit ïa ka tnad Elaka u Bah Denzil Chen ha kaba kala mih ka jingpyni nia ha ryngkat bad ka jingkdew kti ïa kaba ym pat ju sakhi satia hapoh ka ïing dorbar.
Kane kala jia tang hadien ba la kut ka kynta kylli jingkylli, ha ka por ba u MDC ka Shella u Bah Barikupar Synrem.
Haba ïa shim bynta u MDC ka Sohra uba dei ruh u nongïalam ka liang pyrshah u Bah Titos W Chyne u pynpaw ba u kwah ban ïoh jingshai na ka Executive Committee ha kaba ïadei bad ka kam Syiem Sohra namar ba ki khun ki hajar jong ka Hima kila lynga.
Hadien ka jingpynshai na ka Executive Committee lyngba u EM u Bah Denzil Chen bad haba poi ha ka mat kaba iadei bad u Syiem Khynnah ne Deputy Syiem jong ka Hima Sohra kynsan kynsan kala mih ka thma ktien bad ka jingiania hapdeng kine ki ar ngut.
Haba kren bad ki lad pathai khubor hadien ba la wai ka dorbar mang tyngka u Bah Titos u la ong, hapoh ka section 11 ka ai lad ia ka Executive Committee ban thung syiem khynnah ban shimti shipor ïa ka khet Syiem.
Shuh shuh u Bah Titos u la iathuh ba u Executive Member u ong ba um ithuh ïa u Syiem Khynnah katba ka ophis jong ka KHADC pat ka ithuh ïa u Syiem Khynnah, katkum ka shithi ba la phah sha u Bah M Syiem.
Hapoh ka ïing dorbar nga kren beit jai jai, hynrei ka rukom kren u EM ka long kum ka ding bad u la kynnoh ruh ba kadei ka jingbakla jong ki ophisar bad kane ka jingjubab u EM kam long kaba sngewtynnad bad ym pat ju lap ïa kum kane ka jingiakren.
Haba kylli, u Bah Titos u la ong, “lada khlem ka jingmynjur jong u EM ki ophisar kin ym nud bad kane ka jingkynnoh ïa ki ophisar kadei ka sien kaba ar hapoh kane ka Executive Committee”.