Shillong, Rymphang 18: Ka Executive Committee (EC) jong ka Khasi Hills Autonomous District Council (KHADC) ha ka sngi sdang ka Dorbar mang tyngka kala wanrah ïa ka Khasi Hills Autonomous District Council Member Pension Repealing Bill, 2026.
Ïa kane ka Repealing Bill, 2026 ne ka Bill ban ym siew shuh ka bai bam tymmen (pension) ki MDC barim la wanrah da u Executive Member ba peit ïa ka tnad Finance u Bah Seibor Warbah.
Na ka liang u Bah Titos W Chyne uba dei u nongïalam ka liang pyrshah hapoh ka ïing dorbar thaw thaw ain jong ka KHADC u la pynpaw ka jingsngewkhia ïa ka KHADC ba ka kit ïa ka jingkit ba khia ban siew ïa ka pension jong ki MDC barim, wat hapdeng ka jingkyrduh pisa.
U Bah Titos u la ai jingïaroh ïa kane ka sienjam ba la shim kaba long shi bynta kaba long ban pynduna ka jingpynlut ksan ïa ka pisa jong ka Council namar ba ka mad jingeh ha kaba iadei bad ka pisa.
Na ka liang u EM Finance u Bah Seibor Warbah u la ong ba kane kam dei tang na ka bynta ka jingbha jong ka ïing hynrei kaba ktah ïa ka council bad u la kular ruh ha kaba iadei bad kiba dang sahteng, kin pyrshang ban pyndep ïa kaba sah.
